موضة بلادي !! ـ

الظُلم شئ عادي
بأى موضة في بلادي
من عصر أجدادي
والظلم فينا حق !!

والسرقة شئ عادي
للوزرا في بلادي
والشرطة بتنادي
إحنا في خدمة شعب !!

إمسك حرامي يا بيه
دا سرقني ـ إبن الإيه ـ
والله لأبلغ عليه
وأشهد وأقول الحق


ـ وبعد التحريات ـ

حرامي وابن وزير
والباشا جابله عصير
نورتنا يا كبير
مقدرتش أقول لأ

غيرت في الأقوال
وحلفت ع الأفعال
انه ابن حلال
وانا تافه حقير


ـ وبعد إغلاق المحضر ـ


نورت السجن ليه ؟؟
وانا المجني عليه !!ـ
أرجوك تقولي يا بيه
ليه الظلم الكبير !!ـ

قالي أخرس يا واطي
بوس الجزمة
وطاطي
دا انت مُجرم خطير !!ـ

ومضيت على المحضر
والبيه بيتمخطر
اللون دا يطلع إيه !!ـ
يطلع يا بيه أخضر

أخضر دا لون الكوسة
مش تورتة ولا بسبوسة
دي سياسة المحروسة
لأزم أكيد تُصبر

دستورنا دا مُسالم
بشهادة الظالم
حتى ابيه سالم
قالي نفس الكلام

والغش مُش فينا
وضميرنا مالينا
ناقح قوي علينا
ودي موضة الأفلام !!ـ

معلش يا قفايا
تاعبك قوي معايا
بُكرة تيجي نهاية
لكُل ظلم وشر

قالي نهاية مين !!
ينعل ابو التفكير
اللي يخلي حمير
تدفعنا للتغيير
ونقول للظلم لأ

أنا بحب الحكومة
والوزرا والنواب
دي ناس أكيد مظلومة
من حـِقد الكلاب !!ـ

متقولش عايزين تغيير
عايزين نحارب تفكير
والله تطلع برميل
وتلبس الرواية

عارف هتلبس ايه يا زميل
انك هتنور الزنزانة
ممكن تطلع خاين ـ عميل
ـ وسلامنا للظُلم أمانة


محمد البري ـ نوفمبر 2007

::*::علامه تعجب::*::

امر هذه الحياه غريب ومابها من خلق يدعو للعجب والعجاب

وحين ياخذنا التفكير فى تلك الامور ومابها من تناقض

يكون لزاما علينا انا نضع الكثير من علامات التعجب

• 
  
  
  
  فهناك من تجده يدعو الناس ويحثهم على التقرب لله وهوه ابعد مايكون الى ربه



• 
  
  
  
  وهناك من تجده يدعو للحريه والمساواه وهوه اشد الناس عنصريه وتفرقه



• 
  
  
  
  وهناك من ينادي باسم بلاده باعذب الكلمات ويتغنى بحفظه لعرضها وهو اول من ينخر ويفت فى عضدها







• 
  
  
  
  
  
  
  وهناك الاب الذي يحث ابنيه على ان يحب كلاهما الاخر وهناك فرقه بينه وبين اخيه وقطيعه رحم




• 
  
  
  
  وهناك من يسرق وينهب ويخاف ان يكتشف امره الخلق لكنه لا يخاف خالق الخلق



• 
  
  
  
  وهناك من يُفسد فى الارض ناشرا بها الدمار والخراب واصفا ذالك بالسلام بينما التدين يطلق عليه ارهاب



• 
  
  
  
  
  وهناك من تصادقه وتصاحبه وتعطيه روحك قبل قلبك وانت بالنسبه له ليس الا شخص ما يعرفه




• 
  
  
  
  وهناك من يبطش بشعبه ويذله ويهينه مدعيا بذالك الحفاظ على الامن ونشر الطمانيه بين شعبه



• 
  
  
  
  وهناك من يفتي بان خروج شباب هربا من البطاله المحدقه بحثا للعمل فى الخارج بانهم ليسوا شهداء واصفا اياهم بالطمع فى حين انه ومن معه يركبون افخم سيارات المرسيدس



• 
  
  
  وهناك من يدعي حبه لشعبه وحب شعبه له فى حين انه اذا اراد انا يتحرك خطوه واحده من مكانه قامت الثكنات العسكريه ومن قبلها العسكر تأمينا لخطوه سيادته



• 
  
  
  وهنالك من يدعي محاربته للبطاله وتوفير فرص عمل للشباب وهوه اول من يحارب مشاريعهم الصغيره بحجه الضرائب وغيرها فى حين ان هناك رجال اعمال ومطربين متهربين من الضرائب ولا يحرك ساكن تجاههم


• 
  
  
  
  وهناك من يغني ويرقص بالملايين فى الليله وهناك من هوه فى سنه يقف على حدود بلده ياكل الرمال حفاظا على امن هذا الراقص


• 
  
  وهناك من يصدر البوم ديني ويقول فيه الا رسول الله وهوه اول من يحارب الله ورسوله بكليباته الخليعه

وهناك الكثير والكثير من تلك النماذج

لكن لايسعنا القول الا حسبنا الله ونعم الوكيل في من جعل من الحقير الدني سيدا ومالكا وجعل من الشريف عبدا فقيرا مشردا

معلشى ياجماعه هما كلمتين طلعوا مني كده فى ساعه فضفضه لقيت نفسى بمسك القلم وكتبت
وفى النهايه تقبلوا مني فائق التقدير والاحترام

written by kalcool

سلامنا للنظام !! ــ

أولاً سلام عليكم ورحمة الله وبركاته

ثانياً والله يا جماعة مش عارف أقول إيه بس بجد أعذروني عن غيابي الكبير قوي دا ـ السنة دي ربنا وحده يعلم هي تقيلة عليا قد إيه ؟

وعلى العموم انا كتبت حاجا المفروض كُنت اكتبها لما اخلص الشيت يوم السبت بس قولت يلا مش خسارة وكتبتها النهاردة ويارب إن شاء الله تُكون مُعبرة وكويسة

هي إمتداد لعمل ــ أحسن ناس ــ في وصف الحالة في بلدنا

يلا أسيبكم مع الكلمات

سلام أحلى سلام
انا جاي في الكلام
وناوي أبدأ كلامي
بسلامي للنظام

وسلامي للحكومة
الطاهرة والعفيفة
اللي واكلة البارومه
عاملة خضره الشريفة

وكمان تعظيم سلام
للحزب وللإخوان
اللي صوتنا في إيديهم
في مجلس عمو فُلان

عارفين دا مجلس مين ؟ !!ـ
واحد من وسط الشعب
وعلشان مخلص ـ أمين !!ـ
بأى فوق وعالي الكعب

وسلام أحلى سلام
لعمو الشيخ حسين
قايل أحلى كلام
بيجيب فتواه منين ؟ !!ـ

ويقول كمان دا عادي
الرشوة والمحسوبية
زي أكل الزبادي
والكوسة والملوخية !!ـ

عارفين عمو الشيخ
بيفتي بإيه كمان
بأن الشيشة جامدة
بتكيف الإنسان !!ـ

ولا عمو الوزير
عامل شغله تمام
ومضبط التضابيط
عامل أحلى نظام !!ـ

ولا أمين الشُرطة
بأى بيه وإبن بيه
لما تشوفه شاورله
أجري وحب إيده !!ـ

عشان تبأى صح
وتمام ومية مية
وتقول للظلم بح
صحيح أبو مفهومية !!ـ

تعالى ارمي السلام
لحبيبك الغلبان
دا مغرق العبارة
عايش بعيد هربان !!ـ


وأرمي أحلى تحية
لعمكـ الحرامي
تلاقاه بُكرة وزير
خليك فاكر كلامي !!ـ

ودحرج التماسي
على كل شيخ في القعدة
بيألف الفتاوي
أصل الفلوس مساعدة !!ـ

بيفتي بكل كريم
ويقول وصى وقال
وينفي في التحريم
ويكتب عليه
موال !!ـ


وسلامي للداخلية
العادلة والأبية
بتقول للظُلم لأ
ونِعم الإنسانية !!ـ

مفيش أي حاجا
ولا اي مُعتقل
ولا تعذيب وغيره
ومفيش فُلان إتقتل !!ـ

ومفيش أي إهانة
للعدل والقضاء
واللي انضربوا أمانة
غلطوا وأخدوا الجزاء !!ـ

أصلها تمثيلية
كبيرة حبيتين
قلنا نعمل قضية
تشغلكم لو يومين !!ـ

وسلامي للتعليم
للأخلاق الرفيعة
دا التفكير السليم
إبعد عني قطيعة !!ـ


وسلامي للشباب
اللي عايش يكافح
وداخل كُليات
والله ما هو نافع !!ـ

خلاص يا ابني انتا
راح زمن المُعجزات
لو كان عندكـ أمل
فأمل أبوها مات !!ـ

هتتخرج يا عيني
ومسيرك ع الرصيف
هتتشحطط يا قلبي
على حتة رغيف !!ـ

الا في حالة واحدة
عارف انا اقصد إيه
معاك واسطة تزقكـ
ظهر بتسند عليه !!ـ

هتلاقي نفسك فوق
في القمة الأخيرة
لو حتى كنت فاشل
عارف لُبنا وسميرة !!ـ

وسلام أحلى سلام
وخلصت الكلام
وناوي أختم كلامي
بسلامي للنظام
بسلامي للنظام




محمد البري ـ نوفمبر 2007

!!الشيت للجدعان

استرها معانا يارب وعدي الايام دى على خير

ومعلشى ياجماعه على المنظر الكئيب الى انا حاطه ده

كل مابشوف انا الخيم والحاجات دي بيجيلى مغص

اصل بتفكرني بذكريات وحشه

على العموم منتظرين منكم خالص الدعوات

ومنجيكمشي فى حاجه وحشه

======================

وبعتذر طبعا عن الحاله الى وصل ليها البلوج

بس ان شاء الله من بعد الشيت كله يبقى تمام

فرشى التراب

فرشي التراب يضمني وهو غطائي

حولي الرمـــال تلفني بل من ورائي

واللحــد يحــكي ظلمـــة فيها ابـتلائي

والــنور خــط كـــتابه أنســي لقائـــي

والآهـــل أين حنـــانهم بـــاعوا وفائي

والصحب أين جــموعهم تركوا إخائي

والــمـــال أين هنـــائه صــار ورائــي

والاســـــــم? أـــين بــريقــه بين الثــناء

هــذه نــهاية حــالي فـــرشي الــــتراب

والحــب ودع شــــوقه وبـــكى رثــائي

والدمـــع جف مســــيره بعد الـبــــكاء

والـــكون? ضـاق بوسعه ضاقت فضائي

فاللــحد صار بجثتي أرضي سمائــــي

هذه نـــــهاية حالي فرشي الــــــــتراب

الخـــ?وف يملئ غربتي والحزن دائـــي

أرجو الثبات وانه قســــما دوائـــــــي

والرب أدعو مخــلصا آنت رجـــــائي

ابغي الهــــــى جنه فيها هنـــائي
========================================الموضوع ده انا نزلته نتيجه لحادث مأساوى حصل امبارحام وبنتها جيرانا توفاهم الله امبارح فى حادثه عند الكوبرى بتاع قويسنا كانوا متجهين للقاهره وكانوا اساسا لسه مخرجوش من البلد وصدق رب العزه حين قال "قُلْ لا أَمْلِكُ لِنَفْسِي ضَرًّا وَلا نَفْعًا إِلَّا مَا شَاءَ اللَّهُ لِكُلِّ أُمَّةٍ أَجَلٌ إِذَا جَاءَ أَجَلُهُمْ فَلا يَسْتَأْخِرُونَ سَاعَةً وَلا يَسْتَقْدِمُونَ"صدق الله العظيم

فا انا لما رجعت من الكليه وسمعت الخير حسيت كان انا الى مت مش هماوتخيلت لو كنت انا الى مكانهم دلوقتىمانا لسه جاى بردو من مواصلات وقرف
على العموم علشان متطولشى عليكم واجيبلكم اكتئاب زيي بطلب من كل واحد يدخل يدعيلهم بظهر الغيب ويقرأ لهم الفاتحه
وربنا يرزقنا واياكم بحسن الخاتمه
والسلام عليكم

::*::زحمه يا كليه زحمه::*::

::*::زحمه ياكليه زحمه::*::
الحمد لله ياد ياكلكول اديك دخلت صيدله اهوه
لا وايه صيدله طنطا يخربيت دماغك يا جدع
دانته مشكله
وازيك يا دكتور والدكتور راح والدكتور جه ومش عارف ايه

كل الكلام ده كنت بسمعه السنه الى فاتت من كل الى يعرفنى او حتى يعرفنى معرفه سطحيه
لحد ما اتنفخت وبقيت خلاص هفرقع
المهم دخلت الكليه ابص الاقى عدد بسم الله ماشاء الله ربنا يزيد ويبارك
قلت يمكن دخلت كليه غلط
لا هوه فعلا انا دخلت كليه غلط
سألت البشر الى جمبى صيدله دى يا جدعان
ايوه يبنى فى ايه
شكلك مش من هنا على فكره

قلت طب ازاى صيدله والعدد ده
دى كليه قمه ياعم
قمه ايه يبنى
مش بقولك شكلك مش من هنا مش مصدقنى
طيب يا جماعه اكيد فى حاجه غلط
الكلام ده مينفعشى
ادخل اى سكشن الاقيه زحمه
والمحاضره كنت بحضرها يا ايما ورا او على السلالم
والحمد لله كانت سنه زى الفل عليا وشيلت الترم الاول
قولت مش مهم والحمد لله على كل شىء
وادينى استريحت من الزحمه

ادخل الدفعه الجديده على امل ان العدد هيبقى صغير
ده لان التنسيق كمان عالى
دى الكليه واخده من 98 فى الميه
ابص الاقى دفعه اكبر بكتيييير من الدفعه بتاعتى
ياربى
بس استنتجت ولله الحمد استنتاج مهم جدا
::*::ان لم يكن من الزحمه بدٌ فمن الهبل ان تكون مغفلا ::*::
اصل هروح فين وهعمل ايه
وطبعا مش هقدر اهرب من الواقع يعنى وللاسف مش بأيدي تغييره
انا كنت اقترحت يجيبوا نص الدفعه ويضربوها بقنبله واهوه العدد يخف
وياريت لو حد من دفعه اعدادى قرا كلامى ده
نصيحه من اخ ميحطش فى دماغه حكايه العدد دى لانه لو حطها فى دماغه هيتعب بجد

بعد الرغي الكتير ده بقى
انا هدفي من الموضوع ده سؤالين
هل يا جماعه كليه الصيدله هتبقى كليه الشعب القادمه؟؟؟؟؟؟
وهل الكليه هتستحمل الاعداد دى ازاى؟؟ مش قادر افهم
والى بيأكدلى ان كليه الصيدله هتبقى كليه الشعب
انى سمعت من اكتر من مصدر ان طلاب العلوم تخصص كيمياء
ممكن ليهم انهم يكملوا صيدله
يعنى زياده الطين بله
وده طبعا الى متمناهوش يحصل

written by kalcool

بين الفاقد والمُعطي ــ تأتي الرياح ؟

بسم الله الرحمن الرحيم

عودة حميدة للكُليات وللمدارس وللدراسة وللهم تاني

بس هقول ايه ما باليد حيلة

الموضوع اللي هطرحه لربما أكون انا فيه متشائم او تعبان او زهقان !! بس والله انا مش متشائم بالعكس انا بحب التفاؤل جداً بس هقول ايه انا هتكلم في شوية حاجات كدا اهو اعتبرها نوع من الفضفضة

ـ فاقد الحُب اصبح يُعطيه ــ

لعل القول بأن ما من فرد ما عاش قصة حُب وماتت الا وبقيت احلامها الوردية تصرخ بداخله تُريد استرجاع كامل الذكريات واحيائها من تلك القبور التي استحالت لتصبح الذكريات أُناس ماتت بين طيات قبور الزمن والظروف والقهر والظلم !!

ولكن دعنا ننظر لمن فقد الحُب ــ أصبح معطاءاً له ولا ينتظر له المُقابل فقد أصبح كل ما أمامه نفس الشئ ــ يخشى تكرار نفس الموقف !! ويخاف على قلبه ان ينجرح مرتين

فيعيش باقي العُمر مشوش الفكر منصدم العواطف متقطع الكلمات

لا يعرف من أين يبدأ وبماذا ينطق والى من يتحدث ؟

لعله يخفي ما بداخله من جرح او كبت او احزان

ولعل دمعه الذي يصرخ متألماً لا يتمنى هو كفرد ان يظهر امام الناس ولكنه يُخفيه عن أعين كُل من حوله وتبقى نفسه شريدةً بين آفاق ذاك العالم الحزين الذي أراد العيش فيه لوحده

معطاءاً للحُب ولا ينتظر المُقابل

ـ فاقد النجاح أصبح ناجحاً ـ

لعلنا ننظر لكل من حولنا من البشر فنجد من لا يستحق النجاح ينجح ومن يستحق احيانا ما يفشل ولكن لماذا ؟

خلاصة القول هنا بأن ليس كل من كان فاذاً او عبقرياً لابد وان يُصبح عالماً او طبيباً او ما يحلو له من الألقاب

ولكن العقل لا يُعترف به ــ فأنا وانا ذا حالي طالباً بكلية من كليات القمة لا أجد لعقلي أي وسيلة ولا أي غاية سوى انه أصبح دورقاً من الماء يُصب فيه العلم ـ وهو الماء ــ صباً

لأ اعرف هل هذا هو الحال بي أنا وحدي ام ماذا ؟

لعلي ادرك كم قدراتي واني استطيع ان احقق ما لم يحققه أحد من قبل في أي مجال ؟ ولكن كل تلك تُعد أحلاماً وردية يحلمها اي شاب اي طفل يحبو في مهد طفولته

ـــــــــــ

لقد اخترت الحُب والنجاح لأنهما هما مبلغ اي شاب واي احلام لأي فرد

وقد قدمت الحُب على المستقبل لضراوة عُمر المُراهقة وان التفكير المُراهق يسبق التفكير العقلاني وان القلب يسبق العقل

ولكن اهي تلك الحياة !!

استيقظ كل يومِ فأجد اليوم هو نفس الأمس وانا اخلد للنوم اكن على يقين من أن الغد سيُصبح مثل الأمس

لأ اعلم ما تلك الأماني الطوال ولكني عزفت طوال وقتي أفكر ؟

وبعد كل ما يفعله المرء ماذا سيجني ؟

لعلي ولشدة ما اراه من قُرب أجلي او قرب ساعتي او اني سأغادر العالم وانا صغير السن وهي فكرة تراود كل من هو في نفس السن ـ كل من يمر في لحظة ضيق أرى ان للفرد أماني وأحلام ولكن ايها سيحقق

كلما ازدادت احلامك وازداد افق وسعة التفكير بها ازداد انشغالك وقلقك من المُستقبل ،، انشغلت عن ما هو أهم

لربما ان توفتني المنية لأ اكون قد أديت ما علي من حقوق تجاه ربي ولكن ربي أعلم بالنوايا ويعلم ما يتمناه قلبي وعقلي وكل أحلامي

ويعلم ما يتمناه كل فرد وماذا يُريد ان يفعل لدينه ولوطنه ولمستقبله

ولكن رجوت ربي ولعل ربي يُهديني

وكما قيل من قبل

ليس كُل ما يتمناه المرء يُدركه ــ تأتي الرياح بما لا تشتهي السُفن

الحياه فى رمضان شىء تانى

الحياه فى رمضان شىء تانى


فى البدايه كل سنه وانتوا طيبين يا جماعه
بمناسبه شهر رمضان الكريم
وان شاء الله نطلع منه مغفورين الذنوب
نيجى بقى لموضوعنا
طبعا مع كل رمضان بيهل علينا
اكيد شكل الحياه بيتغير وبجد بيبقى للشهر ده نفحات وحاجات جميله جدا
وحقيقى الشهر ده من اجمل شهور السنه
وكمان للشهر ده طقوس وتقاليد خاصه وبتميزه عن اى شهر
فلازم نستغل الشهر ده لانه منحه من ربنا وفرصه للتكفير عن ذنوبنا
وياريت نقلل من الاكل شويه ...بلاش طفاسه
انا عن نفسى لا باكل فى رمضان ولا غير رمضان
اصل انا عامل دايت مزمن :D

بنبتدى يومنا طبعا فى رمضان بالسحور
فيه طبعا الى بيقوم من النوم يتسحر
وفيه الى بيفضل صاحى لحد السحور
بس المهم نتسحر
علشان نقدر نواصل ونصوم ومنجيش قبل الفطار نفصل شحن
وكمان رسولنا الكريم بيقول][تسحروا فأن في السحور بركه][ صدق رسول الله صلى الله عليه وسلم.
وطبعا بعد مابنسحر مش بنام
اوعى حد ينام قبل ما يصلى الفجر
انا قولت اهوه
فيه الى بيقرأ قرآن بعد صلاه الفجر وده بيكون احسن وقت على فكره لقراءه القرآن

نيجى بقى للمؤكلات
الشهر ده طبعا بيجى بخيره
بيقى فيه الكنافه والقطايف وقمر الدين وغيره وغيره
وانا عن نفسى بحب اتفرج على بتاع الكنافه وهوه بيعملها معرفشى ايه الحكمه فى كده:D
بس اهوه ممكن تقولوا عبيط
او علشان بحب الكنافه
ياسلام عليها فى الشربات
تجنن
احم احم
نرجع لموضوعنا
ومن الحاجات السلبيه الى بشوفها فى الشهر ده
ان الشحاتين بيكتروا اوى
انا عن نفسى بيصعبوا عليا والله
بس مش عارف هل صح ولا غلط ان احنا نديهم فلوس؟؟؟
وطبعا فى الشهر ده بقى
بتكتر العزومات وبيزيد الترابط الاسرى بين العائلات
وبنقرب من بعض كتييييير
وفيه ناس بتتجمع فى الشهر ده فى بيت العيله
ويفطروا كلهم مع بعض
وفعلا بيبقى احساس جميل اوى
وبعد الفطار بعد مالواحد يأربع جردلين ميه
بنقوم نتوضى علشان نصلى العشاء والتراويح
ونخرج بعد التراويح نتمشى وكده
علشان الاكل ميكبسشى على الواحد
واهوه الواحد يهضم بردو :D

شوفتوا اد ايه ده شهر جميل جدا
ياريت السنه كلها بقت الشهر ده
والله الحياه دى كانت بقت جنه
ولازم نشكر ربنا على الشهر ده بالاخلاص فى الصوم ونحاول نخلص القرآن ولو مره واحده على الاقل

written by: kalcool

متيجوا نتخانق.....دة عيبك ولا عيبى

نتكلم بصراحة فيها اية يعنى لو اتكلمنا بصراحة هيحصل اية يعنى لو اتكلمنا بصراحة
لية كتير مننا بيدور على عيوب غيرة؟
اية اللى ناقصة واية نقطة ضعفة واية اللى مخبية
مع ان العيب فية
مين اداله الحق فى انه يحاسب غيرة على ضعفة
نسينا اننا واحد اللى خلقنا واحد واننا روح واحدة
كلنا بشر وشخصياتنا بعدد الخلق اللى فى الكون
مش مصدقنى
تعالى نحسبها
تخيل ان فى ايدك دلوقتى رسم بيانى فية انت
فية كل الصفات الحلوة اللى فى الدنيا بالموجب وكل الصفات الوحشة بالسالب
تخيل الكم وتخيل نسبة كل صفة فيك
اه فى صفات هتلاقيها بصفر فى المية

وصفات تانية بواحد على مليون من الواحد فى الميه
بس فى النهاية مجموع كل النسب دى هى الواحد الصحيح
اللى هو انت


وصلت للفكرة
طب عممها
يعنى انت وغيرك وغيرك اللى تعرفه واللى متعرفوش
بعدد الصفات اللى هتجمعها وبعدد النسب اللى ممكن تطلعها
اعمل بئا تباديل وتوافيق
متخيل كام رسم بيانى هيطلع معاك
طب لو بجد متخيل العدد
تبقى عرفت عدد البشر
عدد البشر من يوم مبتدا الكون لنهايتة
وعمرك مهتطلع بنى ادم زى التانى
ومهما احنا اتغيرنا السالب بئا بالموجب والموجب بئا بالسالب
على قد منسبة تزيد نسبة تانية هتقل
فى الاخر كلنا الواحد
وحسابنا واحد
على قد ماخدنا من الدنيا على قد مهنتحاسب
ومهما وصلت فيها
{وَلاَ تَمْشِ فِي الأَرْضِ مَرَحاً إِنَّكَ لَن تَخْرِقَ الأَرْضَ وَلَن تَبْلُغَ الْجِبَالَ طُولاً }
مهما وصلت فى الاخر انسان بنى ادم ضعيف ونهايتك الموووت

مين عطالك الحق تحاسب غيرك على عيبة

خلونا ننسى مين الاحسن فى الدنيا
ونسيب السؤال دة للاخرة وقت ميكون اللى بيحاسبنا ربنا


جميل ان الناس تحبك علشان شايفينك ملاك من غير عيوب
بس الاجمل ان الناس تحبك


على عيوبك

::*::دعوه للبساطه::*::

::*::دعوه للبساطه ::*::
بسم الله الرحمن الرحيم
اول امبارح كعادتى كل يوم خميس انى انزل بنها اتمشى وكده مع واحد صاحبى
حصل حاجه فريده من نوعها
او على الاقل فريده بالنسبه ليا يعنى
واحنا قاعدين على الكورنيش فى امان الله سمعنا صوت طبل وزمامير
قولت للواد عمر صاحبى ايه ده ياد
قالى ده شكلوا فرح يا زعيم (الزعيم الى هوه انا طبعا)
قولتله فرح هنا ازاى
وقولتله قوم بينا نشوف الحكايه ايه

روحت لقيت فعلا عروسه وعريس بيزفوهم على الكورنيش
حواليهم شويه ناس بتصقف وواحد معاه طبله واتنين بيزمروا
واعتفد ان الصور مش واضحه لان عمر صاحبى الله يكرمه معرفشى يصور كويس
على العموم انا عامل سهم على العريس وسهم على العروسه

نيجى بقى لموضوعنا
انا الحكايه دى عجبتنى جدا
لان الحكايه دى اكيد بتقلل من تكاليف الفرح الباهظه الى بتبقى على قفا العريس
يعنى انا نفسى اعرف لما العريس يدفع دم قلبه على قاعه مكيفه وبتاع
ويدفع كمان على الجاتوا واللذى منه
هيستفيد ايه؟؟
كفايانا فشخره كدابه بقى
ثانيا :الحكايه دى تنفع اوى الناس الى على اد حالها
يعنى الى مش يقدروا يكلفوا فلوس القاعه وكده
اهوه ادامهم الكورنيشات ماليه البلد
ينقوا الكورنيش الى على مزاجهم
ويتمشوا عليه فى الفرح
واهوه حاجه فري

ثالثا بقى:بعيدا عن الفقر والغنى
الحكايه دى مصلحه جدا
اولا هتقلل من عدد المعازيم وكده
يعنى هتقلل من الجاتوه والحاجه الساقعه
او بمعنى اصح مش هيبقى موجود لا جاتوه ولا حاجه ساقعه
وكمان الفرح يخلص سريع سريع
يعنى يا دوبك يتمشوا مره ويرجعوا وبعدين يروحوا
وكمان مفيش الصوت العالى بتاع الافراح الى فى القاعات
رابعا :الحكايه دى بتقلل من نسبه العنوسه بردوا
واهوه يعتبر حل كويس

بالنسبه ليا بقى انا نويت ولله الحمد
اعمل فرحى فى الصحرا
اهوه مش هيبقى فى معازيم اصلا
تقريبا هيبقى الا انا وعروستى ويمكن ابوهم وامهم
ااهوه نتاويهم فى اى حته
واخد عروستى واخلع انا
هههههههههههههههه
متخافوش هبقى اعزمكم
لانى عارف ان مفيش حد هيجى منكم اساسا
والى بيفكر يجى ميجيش
لانه هتاويه هوه كمان

وانا من هذا المنطلق ادعوا كل شاب وكل فتاه انهما يعملوا فرحهم على كورنيش او فى الصحرا
فى اى حته نائيه كده يعنى
وكل ماتبقى نائيه كل ما تبقى افضل
وسيبكم بقى من فشخره الافراح والقاعات المكيفه الى جايبانا ورا دى
وخليكم بسطاء
واخيرا اللهم كتر من كورنيشاتك وصحاريكى ونوائيكى يا حكومه :D
وانا مش عارف الحكومه هتعملكوا ايه ولا ايه بس
هتشغلكوا ولا هتشربكوا ولا هتأكلكوا
يا جدعان بلا بتاع بقى
ودمتم

written by :kalcool

رمضان بين ما يتمناه الشيطان ،، وما يتمناه المؤمن ؟

رمضان جانا وفرحنا به بعد غيابه أهلاً رمضان

هل هلالكـ يا رمضان

بسم الله الرحمن الرحيم

أولاً : مبارك علينا الشهر الكريم اللي المفروض كل شخص فينا يخلي الشهر دا في السنة دي نقطة تحول في حياته كلها

انا هتفضل بعرض الحاجات التافهه ووسوسة الشياطين في رمضان وهتتفضل أختنا The Sad Smile بعرض المفروض يتعمل مننا كشباب مسلم

رمضان جه ـــ الأكل ايه ؟ الأم تشغل بالها كل يوم هتعزم مين من العيلة النهاردة ؟ ونعمل أكل ايه ؟ طول الليل والنهار في المطبخ ؟ كل يوم عزومة شكل !! والقرايب وكلام الستات ويجيبوا في سيرة فلان وعلان !! وناسيين انه شهر رمضان ويجي اخر 10 أيام يقولوا العيد جاي ـــ الكحك يا ولاد يلا نعمل الكحك ــ وننسى العشرة الأواخر وليلة القدر ــ مش الكُل انا بقول اللي الشيطان نفسه فيه ــ

ـ








البنات : قاعدة قدام التلفزيون ليل نهار من القناة دي للقناة دي ومن المسلسل دا للمسلسل دا ،، تتصل بصاحبتها شوفتي حلقة إمبارح ــ لأ والله يا بنتي كنت معزومة عند خالو ومقدرتش اشوف المسلسل أحكيلي حصل إيه ــ والعشا تأدن وهي تقعد تحكيلها اللي حصل أكنها هي اللي كاتبة السيناريو بتاع المسلسل !!

هاي يا شيري مش هنروح النهاردة الكوليدج !! ؟ لأ يا منون أكيد هنروح يا حبيبتي يلا قومي البسي واجهزي أول ما توصلي الكوليدج رنيلي وانا هكلمك ،، أوكـ يا جميل باي

تدخل شيري ومنون الأوضة كل واحدة تنقي طقم جميل ومحترم ــ لو ميني جيب ميضرش ــ وتحط اتنين كيلو ميك اب على وشها ــ وتلبس ألوان فاقعة في الأيام دي بتاعت رمضان ؟ معرفش ليه ؟

اللبس المحترم بأى والباديهات والبناطيل الجينز عادي قوي وعليها بادي قصير ــ وميضرش لو شوية " برفن " ومن النوع الأصلي عشان وانا ماشية اشد كل الشباب بأى اصل ريحته خارقة قوي

توصل شيري ومنون الكوليدج ــ هاي ازيكم وحشنا ويروحوا لباقي الجروب ــ أغاني وهلس وتهييس طول الوقت لو مفيش محاضرات ويروحوا البيت يفطروا ويتابعوا المسلسلات

دا رمضان اللي الشيطان يتمنى ان كل بنت تكون فيه كدا

الشباب بأى : صباحو قر والجو حر

أزيك يا بوب عامل ايه واحشني ياد شوفت المزة امبارح ؟ انا لولا كنت صايم ــ مسكت نفسي بالعافية وربنا ــ

ااه تصدق يا بني البت دي صاروخ ،، ــ زود السيئات يا عم زود محدش واخد منها حاجا ـــ

ولا هنروح النادي بالليل بأى أشطه ــ أشطات يا بوب هنتقابل هناك ونروش مع الجروب ونتمشى شوية ليالي رمضان في التمشية والنادي مش بتتعوض

ــ بوب ـــ الو ازيك يا مودي عامل ايه ؟
ــ مودي ــ مية فل يا باشا انتا عامل ايه ؟
ــ بوب ــ تمام ،، يلا بينا ع الكلية ياد
ـ مودي ـ طيب ثواني بضبط شعري وبجلجيله وبعمل قصة جديدة
ــ بوب ــ العب يا عم دا كله عشان البت ــ الله يسهلو

وصلنا الكوليدج ــ سمعت ياد أخر خبر ؟؟

ايه يا رجالة !! ؟

المفتي بيقولك حلال ليك 3 سجاير في نهار رمضان !!

يااااااااااااا راجل !!! اه والله يعم قاريها امبارح ع النت ـ


طيب فول واد يا مادي روح هاتلنا علبتين سجاير عشان نضبط نفسنا ــ ما المفتي محللها اهو ،، عسل أشطة يا عم المُفتي ،، طول عُمري بقول المفتي دا راجل شهم وحاسس بالشباب

بنت معدية من قدام الشلة

يا كوز قشطة ماشي ــ يلهوي يا خراشي ــ متكبي علينا شوية ــ ولا احنا منسواشي

البت تدير وتبصلهم : ايه دا يا سم

الشباب : سم مين يا عسل ،، صباحك اشطة

وOops بأى يلبسوا في حوار ويضبطوا العملية ــ

قضيها صهلله يا ابويا ــ مية فُل كدا يا رجالة الواحد جعان ــ ياااااااااااااه امتى رمضان يخلص بأى الواحد ياكل ويشرب ويتفرج ع البنات بكيف شوية ويعمل اللي هو عايزه ــ أأوف بأى انا اتخنقت

يعم ،، يعني انتا بتعمل ايه

احنا بنام بعد الفجر لو مورناش كلية تاني يوم بنصحى ع الأدان عادي هي هي !!

اه تصدق على رأيك

ــ ما يُريده الشيطان من كل شاب في رمضان ـــ


******



رمضان جانا وفرحنا به بعد غيابه اهلا رمضان

اية دة صحيح فرحنا بية فرحنا طب وازاى استقبلناه مش ضيف وغايب علينا بيقعد معانا شهر فى سنة
فاكرينه ولا نسينا
من سنة فاتت كان معانا
وخيرة كان سابق خطانا
شهر كريم
وضيف غالى
لو نسيت اصول الضيافه
مش هتقدر تنكر خيرة
اوله رحمة واوسطة مغفرة واخرة عتق من النار

مستعدين
مستعد مستعدة
طب يلا بينا نستقبله
خطوته قربت
لسه واقفين مكانا
لسة هممنا مش عاليه
لسة التلفزيون شغال والاغنية بنسمعها
والقرآن بعيد وصلاتنا بنضيعها
ياا والقلب اللى جوة اية اخباره
مصدى اوى مليان تراب
ذنوب كتير
ويا ترى من امتى
من رمضان اللى فات
ولا اصلا ضاع زية زيى اللى قبله واللى قبله واللى.........
ستووووووووووووب
عندك حق
طب يلا بينا نجدد النية
من جواك دلوقتى مش بلسانك
يارب نويت يارب
من صام رمضان ايمانا واحتسابا غفر له ما تقدم من ذنبة
كله كله ايوة كله بس انوى بس
طب نوينا خلاص يارب انا ناوى مضيعش رمضان السنة دى
مش هيعدى رمضان غير وانا مغفور لى
ايوة وعد بينك وبين نفسك
لما تكون صلاه السنة باجر فرض والفرض بسبعييييييين
من غير منضحك على بعض فى جماعه طبعا
طب ولما يكون الحرف فى القرآن بأجر 490000حسنة
يعنى على كدة الاية بكام طب والسورة كلها
جزء طب اتنين
لا لا احنا فى رمضان يعنى هنختم باذن الله مرة واتنين
هو احنا ضامنين يعدى علينا رمضان تانى
لا ولا ضامن حتى نفس تانى
طب واخبار المسجد
لا مش بسال عن صلاه الجمعه
المسجد يعنى الفرض بفرضة
يعنى الفجر حاضر
يعنى اعتكااااااااااااااف
رجعت فى كلامك
جدد النية بسرعه
مفيش وقت
رمضان السنة دى مش هيضيع
لا مش هيضيع
هنصوم بجوارحنا
ونبعد عن ذنوبنا
رمضان جاى واحنا
هنجدد بية قلوبنا

صايمين بجوارحنا عيونا صايمة عن النظرة الحرام ولسانا صايم عن النميمة وقلبنا صافى
صافى بذكر الله

خلونا نبتدى من رمضان دة
نتغير
نجاهد نفسنا
نبعد ونتوووووب عن المعاصى
دى فرصتنا
والكلام اخدنا
وضيفنا قرب


معقول فى حد لسة مستنى؟؟؟


محمد البري ،، The Sad Smile

أحسن ناس ــ شعر عامي

ــ أحسن ناس ـــ


هقعد اقول مواويل
والناس تحدف طوب
مكنش ليه عنتره
مكنش ليه شيبوب

وأقعد اغني بصوتي
الاقي السما ألوان
والاقي جنبي زبالة
حواليها كوم دبان

طول عُمري واد هليس
وطالع صايع وبرم
بروح ميدان رمسيس
واتمشى لحد الهرم


وطول السكة ماشي
عمال بعاكس مزز
اقابل الشويش
يشدني وانحجز

واضربلي كام سيجارة
أعمل احلى دماغ
لا انا ضد الحكومة
ولا عايش بالدراع

وطول الليل أغني
وأقول يا عين يا ليل
الاقي الست تقولي
اصبر !!
الصبر جميل

وامشي وانا مش شايف
معرفش أي قدامي
والاقي واحد مشدود
اااه دا كان اخواني




بلدنا بلد الفن
والرقص والجدعنة
لو كان الهز فن
فوسطي فيه معجنة

ومشيت أكتر وشوفت
شاب في إيده موبايل
ضاربلي فـــ شعره جيل
وعاملي فيها استايل

وامشي كمان واشوف
البوي والجيرل فريند
لا حصلنا الصومال
ولا حتى طولنا الهند


بلدنا دي عجيبة
وأعجب من العجب
لو شوفت الصورة عدلة
يبأى الكتاب أتقلب

والأعجب من دا كله
ينادوا بالحُرية
عايشين احلى حياة
وسلام وديمُقراطية

أخدنا إيه م الغرب
غير هلس ومسخرة
ونقول احنا الفراعنة
ودا اللي جايبنا وره

هقول ايه يا ناس
وهشكي لمين حالي
مصاريف وديون كتير
شاغلة كتير بالي

هي قناة السويس
عاملالنا ايه يا ناس
لا شوفنا منها فلوس
ولا حتى كوم اقفاص



ولا فلوس السياحة
اعرف خدوها فين ؟
اوعى تقول حاجا !!
يمكن نروح فــ !!
كمين

بلدنا دي عايشة
والنهب فيها شغال
الأصل اسمه وزير
والمهنة ليه
نشال !!

ونيجي يوم نغني
وسلامنا للوطنية
ونقول الحالة عال
وفل ومية مية



عايشين يا ناس حياة
احلى من العسل
واللي يقول غير كدا
نلاقيه للسجن
وصل !!

لا هنافق ولا هكابر
ولا هنادي بصوت عالي
انا ابن بلد صحيح
بس الشرف غالي

شرف مين يا عم
سيب الملك للمالك
الكل فيها متعذب
والأكتر فيها هالك

لو كنت ماشي انتا
براحة جنب الحيط
مش شايل منشورات
لأ شايل
معاكـ كبريت!!



تولع السيجارة
وتهيس مع البنات
وتدخل نت
تشيت !!
وتقولي خد وهات

يعم فوق وصحصح
شوف قوتك وقوت عيالك
ركز معايا وفوق
شوف ايه اللي جرالك ؟؟

مش شايف أي حاجا
عملوله غسيل دماغ !!
لا عارف أي حاجا !!!
ولا يملك قرش ساغ

يلا بينا نغني
للكورة والمنتخب
أهلاوي ؟!!!؟
لأ زملكاوي ؟!!!؟
لمن منهم تنتسب ؟ !

شوفت الفيلم الجديد ؟
ايوه اكيد يا عم !
شوفت هيفا بترقص ؟
اه !!!
للنقطة كنت بلم


ويقولك ايه هنكتب
اغاني في الشرف
شرف مين يعمي
ابعد بلاش قرف !!

احنا عايزين نبايع
وننطاطي راسنا ليهم
نعيش دايماً قفا
مختوم ياما بإيديهم




خش يا بني وعلم
ع الحزب ع الحبايب
لا تقولي كبر ونفض
ما ضميرنا مات و غايب

عايشين يا ناس في ظلم
و سجن وبهدلة
واكبر حاجا نشوفها
صحفي عامل
بلبلة !!

يعم روح واتلهي
وشوفلك تمن حشيش
خلي الدماغ صاحي
ولعها يابا وعيش !!

روح شوف كليب روبي
او فيلم عادل إمام !!
ومتقولش حكومة وحشة
أوعى !!
تاخد إعدام

متقولش ايه اللي بيحصل
متقولش ايه اللي جرى
كل ما نطلع خطوة
نرجع مية لوره


ونمشي مع الحكومة
نقول الله عليها
لا عارفين السياسة
ما الكُل بيفتي فيها


ونقول سلام كمان
للدين وللأمانة
لو كان ضميرك حي
روح اقرب
اجزاخانة !!!



جبلك سم قاتل
وسم نفسك بيه
مش لازم ويا مايه
خليها كركاديه !!!



عايز تقول الحق ؟
ولا هتشهد زور ؟!
وتاخدلك المعلوم !!
وتغطي ع المستور

يعم ربك حافظ
هو لوحده العليم
بأن الزمة صاحية
اديني
كام مليم ؟!!

و هقولك كل حاجا
وهقول احلى كلام
هتسقف في المجالس
وتزود الأختام !!

هنبيع بنك مين !!
موافقة م الجميع
يطلعلنا الخبر
مع اشيك
مذيع !!!


يا عم هاتلك كيلو
من الكوسة بتاعتنا
هتوصل للمُراد
بس ابأى ادينا حتة ؟


عارف انا اقصد ايه ؟؟!
لأا عيب انا مش مرتشي
انا عايز كادو
وحاجا كدا
شفتشي !!!

يا عم سك ولخص
وهات من الأخر
هنعيش نقول مواويل
والقاري ليها ساخر



سلام عليكم


محمد البري ،،ـــ

!!عذراُ يا مسجدى

::*::عذراً يا مسجدى::*::
بمناسبه الذكرى المؤلمه لحريق المسجد الاقصى
حبيت انى اعمل الموضوع ده لعل وعسى نفتكر اولى القبلتين وثالث الحرمين
ونعرف حقه علينا فى الدفاع والتضحيه من اجله
ويارب منكونشى نسينا انه مسرى ومعراج اشرف الخلق عليه صلوات الله ورحمته وبركاته
ويمكن احنا فى ظروف صعيه جدا تعيشها القضايا العربيه بوجه عام والقضيه الفلطسنيه بوجه خاص
من اقتتال بين فتح وحماس على السلطه
ومابين المجازر الى تفعلها القوات الانجلوامريكيه فى بلاد الرافدين
ومايحدث فى السودان ومشكله دارفور
والصومال.....وغيرها وغيرها

نرجع لموضوعنا وهوه حريق المسجد الاقصى
ففى يوم الخميس الموافق 21 اغسطس عام 1969
قام حفيد من احفاد القرده والخنازير
وهوه مايكل دينس روهن وهوه استرالى الجنسيه
حيث قام بإضرام النيران فى الجزء الشرقى للمسجد المبارك
اتت على محتوايات هذا الجزء والمنبر التاريخى المعرف بمنبر صلاح الدين
وماكان من المسلمين الا وان انتفضوا وثاروا(كالعاده المعتاده)
وبعد صلاه الجمعه بساحه المسجد
خرج المسلمين بثورات عارمه تندد بالحريق
ويمكن من نتايج الحريق المفيده شويه وهوه عقد اول مؤتمر اسلامى بالرباط بالمغرب

نيجى بقى لذلك الحقير مايكل دينس روهن
ده مسيحى استرالى كان يتستر خلف الديانه اليهوديه
وكان يدعى انه بعث من قبل المسيح لازاله المسجد الاقصى حتى يتثنى لليهود بناء الهيكل المزعوم
والذى بدوره سيعجل من ظهور المسيح مره اخرى
وان يحكم العالم الف عام

وبعد فعلته القذره
قامت القوات الاسرائيليه بالقبض عليه وتقديمه للمحكمه
وادعت انه مريض نفسى(مجنون يعنى)
واودعته مصحه نفسيه وبعدها ارسلته الى بلاده مره اخرى

================================

بعد الكلام الطويل ده والحكايه المؤلمه دى
انا مش عارف هنفضل ساكتين كده للامتى
ليه الدين بتاعنا هان علينا للدرجه دى وليه بعدنا عن ربنا اوى كده
داحنا تقريبا نسينا ان فيه حاجه اسمها المسجد الاقصى
والله لو عدنا لربنا واخلصنا فى عبادته هيكون معانا وهيأيدنا على اعدائنا
(وان تنصروا الله ينصركم ويثبت اقدامكم)
وان كنا خلاص تقطعت بنا السبل
وبقينا مكتوفين الايدى والارجل
واصبحنا كالحجاره لا نحرك ساكن
اعتقد ان مازل لينا لسان ولينا رب مش بيغقل ولو لحظه
فعلينا بالدعاء للمسجد الاقصى ليل نهار
وبإذن الله الاقصى سيعود لا محاله

written by:kalcool

إثنى عشر مصطلحاً خارج قاموس حياتنا بمصر ؟؟ سارع بالشراء قبل النفاذ

القرآن الكريم ....دستورنا الأول والأخير وخلقنا الأول والأخير

ليتنا نعمل به





1- الدين : أصبح الدين خارج حدود حساب الحكومة المُبجلة ،، وضح ذلك في أكثر من مناسبة وقد نسوا كُل شئ بل الدين كاملاً بحدوده وقد أصبح سب الدين أمراً طبيعياً في الشارع المصري ،،

واطيعوا الله والرسول واولى الأمر

وان كانوا قد نسوا الدين ومبادئه فهل الشعب لن ينسى الدين بما فيه ؟

وزارة الأوقاف وفتاوى مصر الرهيبة ،، الإعلام الهادف وما نراه فيه من رقص وخروج عن الحياء وخدشه ،، والإستهزاء بالعلماء وغيرهم

2- الإحترام : انعدم معنى الإحترام في المجتمع ،، واندرج بين الناس قول " المحترم بينضرب بالجزمة " واسف في الجملة ولكن فعلاً هذا ما يحدث فأي مُحترم في هذا الزمان لو لم يكن له سند وظهر " واسطة وكوسة " سيتذوق من أيادي المُخبرين الجميلة وامناء الشرطة ما يجعله يُحدد ان كان ما بالعُلبه فيلاً ام خاتماً




3- الحياء : نرى الشارع المصري قد انعدم به الحياء ،، سب ولعن والفاظ بذيئة ،، موضة عجيبة ،، بناطيل تسقط من الأوساط وكأن قوة الجاذبية قد ازدادت لتشد البنطال شداً الى الاسفل ،، وقصة شعر غريبة ،، وانسيالات في أيادي الشباب وموبايلات وعلب السجائر ،، وحُب في الطريق ،، قُبلات المُنتزه ،،



" وعلى عينكـ يا تاجر " كما تُقال بالأمثال المصرية وايضاً " اللي ما يشتري يتفرج "

والبنات لا أدري ما هذا ؟ مشكلة جيل فعلاً ولكن الحياء انعدم ولا اقصد للجميع ولكن الغالبية العُظمى انعدم لديها الحياء

4- الأمانة والضمير : قال تعالى " وقل اعملوا فسيرى الله عملكم ورسوله والمؤمنون "

وقال الحبيب صلى الله عليه وسلم " ان الله يُحب اذا عمل احدكم عملاً ان يتقنه "

ولكننا نجد عكس ذلك

نجد الموظفين أغلبهم أصبح " مُرتشي " ولا يقضي المصالح إلا بالمال

و البعض الأخر " واغلبهم النساء " يمضي الحضور والإنصراف فقط ولا يقوم بأي عمل ؟

ومن النساء من تصطحب معها الكوسة وورق المحشي ولو وصل الأمر ان تأخذ البوتجاز معاه لأخذتها كي تُعد الطعام وتختصر الوقت عند العودة للمنزل

والمفروض نقول للمثل

" لو ضميرك صحي تاويه "

اقتل ضميرك يا بويا والمثل زي ما بنقول " معاك فلوس تدوس ،، ومعاك واسطة تعدي "

تقولي أمانة وضمير يعم اجري


5- الثقة : إنعدمت الثقة في اي شئ الآن لا نعرف ما مصدر الماء الذي نشربه ؟ وهل الخضروات مسطرنة ام لا ؟ وهل اللحوم مجمدة ام طازجة .؟ وهل الذبيحة كانت حية قبل ذبحها ام لا ؟ وهل هي ذبائح ام هي حمار كبعض الجزارين يبيعوا للناس لحوم الحمير ؟

وهل اللبن مغشوش ام لأ ؟ وهل الحليب مغشوش وهل الزبادي ؟ وهل وهل وهل ؟ مليارات الأسئلة تدور بمُخيلتنا الآن

6- الإيثار : قال رسول الله صلى الله عليه وسلم " لا يؤمن أحدكم حتى يُحب لأخيه ما يحُب لنفسه "

صدق رسول الله صلوات الله عليه وسلم

الآن انعدم الإيثار واصبح كل شئ " هات وخد " وايضاً " لو ليكـ عند الكلب حاجا قوله يا سيدي "

واصبح الحقد يملأ القلوب فالأخ ينظر لأخيه في ماله وفي اولاده وفي كل شئ ،، والصديق ينظر لصديقه في تفوقه وفي مستوى معيشته وفي اشياء كثيرة ، والفتاة تنظر لصديقتها لجمالها ولبسها والخ

أصبح الجميع سُكارى لمرض الحقد وانعدم الإيثار واصبح كل فرد يُساعد الأخر على مضُض ،، وهو يقول في عقله " وأنا مال اهلي يا عم "


7- النخوة والوطنية : ولقد انعدمت في مصر كل معاني النخوه والأخوية والوطنية وكل شئ ؟ نجد ان نصف البلد اصبح مُخصخصاً ،، واستباحوا عرضنا وارضنا وكل شئ ؟ ونرى الحكومة ساكتة لا تُبالي وكأن على أفواههم مفاتيح قد تم غلقها بفعل فاعل ،، وكأن على قلوبهم سلاسل غلظت قلوبهم ،، وأصبح كل شاب لا يجد ما تقدمه بلده إليه من مستقبل ومن وظيفة محترمة ومعيشة كريمة ،، فأصبح معنى الإنتماء مُنعدم ،، تحدثه مصر هي أم الدُنيا مصر ومصر يقول لك " يا خي ينعل ابو مصر ،، كانت عملت ليا ايه البلد دي ،، بشتغل ويطلع عين اهلي في المزاكرة في 12 سنة تعليم للثانوية وبعدها المرحلة الجامعية ،، واتخرج بتفوق والاقي عيل زبالة لا راح ولا جه عشان ابوه مين وامه مين وعمه مين يتعين وانا احجزلي مكان في صف البطالة واقعد جنب ابويا وامي استنى المصروف واحجز مكاني وصفي الأول في القهاوي واشيش وادمن واشرب سجاير وملقيش اللي يحاسبلي على طلباتي في القهوة ،، وادمن المخدرات والحشيش واشرب خمرة واعمل اللي اعمله عشان انسى ان حلمي اتدمر بسبب حكومة لا تراعي الله في اي حاجا يعم مصر مين ؟ كانت عملت ليا ايه ؟ منا متلقح اهو زي اي زبالة في الشارع ،، محدش طبب عليا ،، مشوفتش مصر أمي قامت تطبطب عليا وتحضني وتقولي معلش يا بني شدة وتزول ،، وتقولي مصر ،، يعم فوق من الوهم دا والنبي وسبني في حالي هتطير النافوخ والبرج اللي انا عامله النهاردة وممعايش فلوس اضربلي مسمار ولا اجيبلي حباية ولا اخبطلي سجارتين ولا حجرين شيشة ،، اعتقني الله يخليك "

8- الجرأة : انعدمت الجرأة في مصر و قد نسي الناس انه من رأى منكم منكراً فليغيريه بيديه فإن لم يستطع فبلسانه فإن لم يستطع فبقلبه وذلك أضعف الإيمان

وان " الساكت عن الحق شيطان اخرس "

كلنا بقينا عبيد يا جماعة ،، محدش قادر يفتح فمه او يتفوه على الحكومة بما قيل وقال ،، وكل حالنا اننا خائفون

اليس افضل الجهاد كما سًئل الرسول صلوات الله عليه وسلم هو قول كلمة الحق في وجه المستبد

اصبحنا لا نُبالي وكأن البلد لم تكن في يوم بلدنا والبيت لم يكن بيتنا واكننا غُرباء ومغضوب عليهم في أماكنهم

بالعامي مشبعتوش أكل على قفاكم يا شعب ؟ هيجي الوقت وامتى تقولوا قفانا ورم يا حكومة ؟

لإمتى هتفضلوا تتسرقوا وتتنهبوا وانتم ساكتين ولإمتى ؟

مش بنقد الحكومة الناس كلها بتتعلق في ديل الحكومة زي ما اتقالت في فيلم عمارة يعقوبيان وفاكرين ان الحكومة امهم اللي خلفتهم ونسيتهم

لأ الشعب كله غلط فين المعاني دي فين ؟

وتيجي تتكلم في السياسة لأ يعم انا مش هضحي بعمري عشان خاطر كلمتين لا هيزودوا ولا هينقصوا

خلاص كل واحد يقفل السوستة اللي على فمه ويسكت ويخرس خالص وميتكلمش ويقول مستقبل ولا اي حاجا

9- العلم والثقافة والهوية : يجي واحد يقولي يعم مسمعتش واحد هابط اسمه اللمبي بيقولك " علم ايه اللي انتا جاي تقول عليه ،،انتا شايف الوزارة عاملة فيه إيه "

التعليم انعدم ،، الثقافة اتعقمت ،، الهوية اندثرت

فاضل إيه تاني أصبحنا كيان بلا روح واصحبنا منزوعي الروح والأمل والعُمر والصحة وكُل شئ

هل التعليم في مصر تعليم يجدر به ان يكن في مصطلح العلم بأنه تعليم ام انه تعبيط وهلس وكلام هرش دقون واكل عيش بحلاوة بالعقول

والجامعات الخاصة وغيره وغيره ؟ والخريجين اللي مشرفين في دكة البُدلا

10- اللامُبالاة : الشعب اصبح شعب هليس ؟ شعب بتاع كيفه وبس !! الشعب كل همه ياكل ويشرب ويضحك وبس اخر حاجا تتوقعها كرد فعل منهم على اي حاجا بتحصل في البلد انها يوم يومين وتتقفل ويطلعوا عليها نكتة ماسخة ويقعدوا ينقلوها ويضحكوا ،، ولسا بينضربوا على قفاهم وراضيين

لا مُبالاة غير طبيعية مش عارف نتيجة لإيه بجد

11- الرحمة : قد انتزع المال والثراء والمنصب الرحمة من قلوب الناس فنجد وزارة الداخلية تفعل ما تشاء بالشعب ،، تعذيب وسجن وجلد والخ واين حقوق الإنسان واين تكريم الله عز وجل للإنسان كل ذاك اندثر ،، واصبح احد لا يُبالي بأحد تجد الناس بالشوارع وهناك خناقة او لربما شخص يُقتل ويتركوه يُقتل ولا يُبالوا وإن سألوا " منعرفش يا باشا " او " مكناش مركزين "

حتى لا يضيع وقتهم الثمين حتى يجدوا خبر جديد ونكتة اجدد للإستمتاع بها بدلاً من تضييع الوقت في المحاكم والأقسام

12- المصداقية : انعدمت مصداقية الحكومة لدى الشعب ،، فلا نجد بياناً يُنفذ قالوا الكوادر لقينا الأسعار زي الزفت

قالوا هنجيب لكل مواطن العيش لباب بيته لقينا القمح هيخلص

قالوا هنحل البطالة لقيت العدد تضاعف بشكل رهيب

قالوا الديموقراطية لقينا نص الشعب في معتقلات وسجون

قالوا تعديل دستور لقيناه تخريم وتخريب دستور

قالوا هنعلى بمصر ونخليها دولة عالمية لقينا مصر في أخر ترتيب الدول في العالم
قالوا هنعيشكم احلى عيشه وهنسدد الديون

الديون زادت وحلقوا للشعب ولبسوه الطقيه


سارعوا بحجز القاموس قبل نفاذ الكمية ،، العرض ساري لفترة مؤقتة ،، بادر بالحجز واشتري القاموس تحصل على احترام الجميع

السعر = بيع ضميركـ وذمتك وعرضك ونفسك

المكسب = تكسب احترام الجميع

الخسارة = تخسر نفسك بس مش معاهم بينكـ وبين نفسك

ربنا يعينكم

والسلام مسك الختام

سلام الله عليكم ورحمته وبركاته


تم بحمد الله

محمد البري

::*::امام مرآتى::*::

::*::امام مرآتى::*::

السلام عليكم ورحمه الله وبركاته
اكيد كلنا ياجماعه بنقف وبنبص على نفسنا فى مرايتنا
فيه الى بيقف يظبط شعره ويعدل القصه
وفيه الى الى بيقف يظبط قميصه
الى اخره

مفكرناش كده فى مره نبص على نفسنا
ايوه نبص على نفسنا مش شكلنا...تبص على نفسك انته
تبص وتسال نفسك كده
هل انت راضى عن نفسك كده
شايف نفسك كده صح
ضميرك مستريح من الى انت فيه
شايف انك بتعمل كل الى عليك
اسأله كتير لازم تسألها لنفسك وتشوف انته رايح منين وجاى منين

وبما ان انا الى كاتب الموضوع فهحكى عن نفسى انا
انا بالنسبه ليا عمرى ماوقفت ادام مرايتى ولقيت ان انا كده راضى عن نفسى
مش عارف ليه
نفسى اعرف انا ليه مقصر
هل ده استعباط منى ولا حظ سىء ولا ايه بالظبط
مش عارف
كتير بيقولولى انت كويس وانت مش عارف ايه
بس انا شايف غير كده خالص
انا شايف نفسى انسان تافه مش عارف هوه بيعمل ايه ولا بينيل ايه
يعنى يمكن لما كنت صغير كان ليا هدف عن الى انا فيه دلوقتى
يعنى لما كنت صغير كان نفسى ادخل صيدله وابقى دكتور صيدلى
والحمد لله ربنا وفقنى فى كده ودخلت الكليه الى انا عايزها واختارتها
وبعدين ؟
انا دخلت الكليه من هنا وخلاص
كأنها نهايه الدنيا
خلاص حسيت كان مليش هدف بقى
مانا خلاص الى كنت عايزه حققته
مكنتش اعرف ان ده لسه بدايه تحقيق الهدف
فقضيت فتره من التوهان واللامبالاه الى عمرى ما عشتها فى حياتى
لحد ما جت الصدمه الكبيره
شيلت الترم الاول....
ايوه شيلت الترم الاول فى اول ترم ليا فى الكليه الى هيا امنيه حياتى
سالت نفسى هل انا استحق كده؟؟
لقيت فعلا استحق كده واكتر من كده كمان
طيب ليه كده رغم ان انا مظلوم فى مواد ؟
هوه حظك كده
يعنى ايه حظى كده
اللهم لا اعتراض انا عارف انى قصرت اكيد
ومكنتش مهتم بالكليه خالص
بس انا بشوف اصحاب ليا اقل منى
وبيستعبطوا اكتر منى بكتير
والحمد لله ربنا سهلهم ونجحوا
هرجع واقول برده اللهم لا اعتراض
وانا عارف ان ده نصيبى وانا راضى بيه
والحمد لله على كل شىء
ده جزء يعتبر كنت مقصر فيه
يتبع بعد كده فى موضوع تانى بقيت التقصيرات

والحمد لله يا جماعه انا راضى بنصيبى
بس دى كانت مجرد فضفضه كده
وياريت كلنا نقف قدام مراياتنا ونشوف ان كنا راضيين عن نفسنا فعلا
ولا كالعاده ....لأ؟؟

written by:kalcool

رحلتي في عالم المنتديات والمدونات = قمة التفاهه

رحلتي في عالم المُدونات والمُنتديات

بسم الله الرحمن الرحيم

والصلاة والسلام على اشرف الخلق سيدنا مُحمد الصادق الوعد الأمين

أما بعد ،،،

الموضوع هيجعلني اتكلم باللغة العامية اكثر من الفصحى

يا جماعة يا زوارنا يا اخوانا في المدونات والمُنتديات ليا سؤال بسيط بس ؟

ليه بأت المواضيع تافهه ؟ وليه كُل واحد يدخل يعمل بوست على موضوع تافه اصلاً ؟

انا نفسي اعرف ؟

ادخل منتدى او بلوج جامد الاقي مواضيع كويسة ميتردش عليها نهائي وموضوع تافه يترد عليه فوق الـ 25 رد .. نفسي أعرف ليه؟

هل أحنا اصبحنا مسلوبيين التفكير والعلم والمعلومات والثقافة ؟ مبقاش لينا غير في الهلس والكلام الهجص دا ؟ هل احنا اصبحنا من كتر " عبقريتنا الخارقة " مبقيناش نتكلم في المواضيع العامة لأنها زي ما قال عمرو دياب " خلصت فيك كل الكلام " ليه بأى انا نفسي افهم ، هل زي ما قال حماقي " خلص الكلام " او زي ما قال صادق في اغنيته " خلصت الحكاية وخلاص احنا في أخرها " ، الله أكبر يا جماعة استطعنا اننا نخلص الكلام في كل المواضيع الحيوية فأتخنقنا قولنا نعمل مواضيع تافهه نروح بيها عن نفسنا ؟

ممكن حد يتهمني بأني بهاجم حد والله انا ما بقصد اي حد انا فيه مدونات ومواقع بحترمها وبحترم أصحابهم جداً لا داعي للذكر ولا مجال للحصر أكيد ؟

بس انا اتخنقت لما أدخل الاقي دا بيحصل يا جماعة ؟ هل هنفضل تافهيين كدا ليوم نبعث او ليوم ما نموت ؟ امتى تفكيرنا هيصحى ونبدأ نتكلم في حاجات في سننا وليه منتكلمش في حاجات أكبر من سننا كمان ؟

العباقرة أحسن مننا في إيه ؟ والعلماء دول أحسن مننا في إيه ؟

بل الغرب أحسن مننا ليه ؟ نفسي اعرف ليه ؟ لأنهم وقت الجد جد ووقت المرح واللعب للهزار وبس اما احنا بأينا شعب مهييس وبيقضي وقته بأي حاجا واصبحنا فاضيين

وزي ما قال المثل " الفاضي يعمل قاضي " ، وبسم الله ما شاء الله الوقت الفاضي بتاعنا كتير قوي يا جماعة ، اه احنا في الأجازة مثلاً بنصلي وبنذكر ربنا وبتعبد ، ونخرج ويا صحابنا ، ونقرأ ، وندخل نت ، ونتفسح ، وبنلاقي وقت للتفاهات صح ؟ بنعمل كل حاجا من دي وبنلاقي وقت للتفاهات ؟

نفسي اعرف إيه وجه الإستفادة انك تشارك في " بلوج " او " مُنتدى " بتعمل ايه انا شايف اني بقدم رسالة والله في الحوار والتفكير ؟

هل كلكم شايفين انكم بتقدموا رسالة ؟ ولا هنقضيها هلس وضحك وبس

انا فكرة الموضوع جاتلي لما شوفت أخر بوست للدكتور محمد " Kalcool " وبجد دا شجعني اني اكتب الموضوع

ليه يا جماعة نصبح تافهيين وعُبط للدرجادي ؟ ولإمتى ياريت رد ؟

ولو حد قرأ الموضوع مش عايزة يرد بينه وبين نفسه بس يقول إيه استفادته من اللي انا قولته من مشاركته في البلوجات والمُنتديات

ياريت أسباب منطقية للتفاهه ؟ وليه لما واحد يحكي بيحكي عن نفسه مواقف قديمة ؟ عشان نخلي الناس تضحك ؟ على كدا افتح انا موسوعة او انشر كتاب بمواقفي عشان الخلق تضحك ؟

ممكن كمان نفتح ركن للدردشة اه ؟ وانا صغير كنت يا جماعة بعمل كزا وكزا وكزا

يجي رد في بوست " هههههههههه والله بوست شديد ايه دا ايه الجمال دا والله هموت على روحي من الضحك " هل هي دي معاني الذاتية في نظركم ؟

الله اعلم ربنا يكرم

هنفضل تافهيين لإمتى سؤال يطرح نفسه وكل واحد يجاوب في سره او برد دا يرجعله بس دا رأيي ؟


وانا اسف لو حد فهمني غلط بس والله انا ما بوجه كلامي لحد مُعين

والله المتسعان

والسلام مسك الختام

سلام الله عليكم ورحمته وبركاته

اتخنقت !!

اتخنققققققققققققققققققققققت
اتخنقت !! دى مش اغنيه محمد محيي
لان محمد محيي فى الاغنيه اتخنق من سبب
انا بقى اتخنقت من اسباااااااااااااااااااااااااب
هعرضها عليكم لعل وعسى تتخنقوا معايا
ماهوا مش هبقى انا لوحدى يعنى
طبعا كلكم بتقولولى خير ياعم الخنيييييييق عايز ايه؟؟
اكيد كلنا بنخرج نتمشى فى الشارع وكده ....اكيد يعنى
طيب حلو اوى كده

طيب ايه رأيكم بقى فى الى بتشوفوه فى الشارع هل بيعجبكوا؟؟
هل بيعجبكم حال الشباب الى واقف على النواصى
بيعجبكم حال البنات الى عماله تلف فى الشارع
زى لا مؤاخذه الى بتلف حوالين ساقيه
المشكله ان البنت من دول تلاقيها لبسالك لبس ميتلبسشى فى البيت اساسا
يعنى انا مثلا شوفت ولد بيعاكس بنت
البنت ولامؤاخذه كانت عامله زى الى مش لابسه
المشكله البنت ردت عليه بقى تقوله ايه
بتقولوا يا سافل
ياحلاوه ياولاد
والله كان نفسى اديها خمسين قفا على فجأه من غلى منها
يعنى بزمتك يا شيخه مين الى سافل
سبحان الله
دانا حتى كمان روحت للولد الى عاكسها ده وقولتله
على فكره انته محترم عنها
ادى سبب من الاسباب

====================================

نيجى بقى للشباب
تبص تلاقى الولد من دول مش طايق نفسه
وماشى مسقط البنطلون وضارب سمعات فى ودنه
ولابس برموده
وتيجى تقوله ايه يبنى ده
يقولك دى موضه يابيئه
يا حلاوه ياولاد هيا دى الموضه
دهيه تحرقك انته والى اخترعها
ودلوقتى الى بتلاقيه لابس قميص وبنطلون وماشى محترم
يتبصله كانه حاجه غريبه وجاى من كوكب تانى
ويقولك شوف الناس القديمه
ده من ايام الهكسوس ياعم
سبحان الله
حاجه كمان
بلاحظ دايما ان معظم كلام الاولاد على البنات واعتقد البنات كذلك
يعنى مثلا ليا اصحاب كتيييير ...مش اصدقاء اصحاب فى فرق
لما اجى اقف ولا معاهم ولا حاجه
متلاقيش ليهم كلام غير البنات وشوفت دى
ومش عارف دى ايه
شباب حقيقى تافه جداااااا
مش وراه غير التفاهات والمواضيع الفارغه
لكن يتكلم فى مواضيع مهمه وكده لالالالالا
عليه العوض فى المحترمين
الاحترام عندنا بقى حاجه غريبه ومنبوذه

================================

نيجى بقى لكارثه الاباء
انا كنت بقول ان الولد من دول يا ايما يتيم الاب والام
لا دانا كنت بقول انه يتيم العيله كله
علشان كده محدش بيكلمه ولا بيقوله لا
تيجى تبص بقى تلاقى الولد او البنت ماشى جمب والده او والدته
بنفسسسسسسسس المنظر بالظبط
وعادى جدا
معنى كده ان ابوه وامه وابوها وامها موافقين على كده
طيب ازاااااااااى ياناس
وليه كده
تيجى بقى لو حد عاكسها ولا بتاع
يقوم عليه الدنيا كلها
ويحلف انه هيا خد بالقصاص منه
وانه هيدبحه و.....و.....الخ
طيب ازاى ياعم انته سايبها تمشى فى الشارع كده
وجاى تتكلم
روح يا راجل يا هفأ
والله حتى كلمه راجل دى بتتبرى منك ومن امثالك
اكيد فيه اباء كويسين طبعا
بس هما فيييييييييييييين
وفين الدين والقرأن الى كانوا بيعلموهولنا زمان

=============================================

نيجى بقى للكليات
انا عملت لقاء مع الطلاب الى داخلين كليات ...ان شااء الله
وسألتهم بقى شويه اسالها
امثله من الاسئله دى على سبيل المثال:
هل ليك طموحات فى الكليه؟؟
بص ياعم انا الحمد لله دخلت الكليه الى هما عايزنها....لا حظ هما الى عايزنها
وعملتهلم الى هما عايزينه
يعنى ايه ياااااض؟؟
يعنى خلاص بقى فكك مفيش مزاكره فى الكليه
يادوبك هزاكر علشان انجح وخلاص
غير كده مفيش
بسم الله ماشاء الله عليك يبنى

طيب سؤال كمان
ناوى تعمل ايه اول ماتدخل الكليه كده؟
انا ياعم ناوى اظبط نص البنات وامشى معاهم
واقعد معاهم بقى على الكافيه
واتمشى معاهم
واشوف حياتى بقى
الواحد تعب كتييييييير

اشطه عليك
هوه انته لسه شوفت حاجه؟؟

طيب تسمع ايه عن الكليات؟؟
كل الى اعرفه ان هناك فيه مزز ....اسف فى اللفظ
وهناك الحياه فريييييي
ايه؟؟يعنى ايه دى
فرييييييييي يا جاهل
يعنى تعيش بدماغك ومحدش يوجعلك الجمجمه
اسف يا استاذ معلشى عقلى على ادى

طيب ده والنبى داخل كليه ده ولا داخل كباريه؟؟؟؟؟
مع العلم ان ده تفكير معظم الطلاب الى داخلين الكليات
من اول الطب لحححححححححد المعاهد

كفايه اوى كده
والى انا قولتله ده على فكره ميجيش نقط فى بحر الاسباب الى خنقانى ومخليانى مش طايق جلدى اساسا
ها ايه رأيكم بقى؟؟
اتخنقتوا ولا لسه؟؟؟؟؟

تمت بحمد الله

محمد إبراهيم

هل مصر هي بلد الشاي بالياسمين ؟

هل مصر هي بلد الشاي بالـــ " ياسمين " ؟ !! ؟

تُعتبر السياسة في مصر لغز من ألغاز القرن الحالي لا نعلم له أي قواعد أو أي أبعاد

فلمدة ثلاثون عاماً ظل للحزب الوطني الصدارة في إعتلاء المناصب في البلاد ولمدة ربع قرن كامل في عهد ا لرئيس محمد حُسني مُبارك بقي هذا الأمر وهكذا دواليك ....

" ولكننا الآن نتحدث في أمر هام الا وهو " انا وهو والمُرتشي " مش " انا وهو وهي

لو بقيت الكلمة ( أنا وهو وهي ) إذاً ستعود " هي " على ـ الرشوة ـ

هل حقاً أصبحت مصر هي بلد الرشوة ؟ في أي مكان وفي أي مصلحة من أجل ان تُريح أعصابك وتتجنب زحمة الطوابري ما عليك الا ان " تشخلل جيوبكـ " كما تُقال من جانب قطاع الطرق " شخلل جيوبكـ وانا اعديك " ـ

هل أصبحت في مصر " شخلل جيوبكـ وانا اعملك اللي تؤمرني بيه "ـ

هل أصبح الناس وكل من بمنصب بائع لضميره ، ونسي انه قد لعن الله الراشي والمُرتشي

لا أعرف بل لربما نسي تعاليم دينه ، وهل هو متذكر كل تعاليم دينه حتى يتذكر مثل هذا الحديث

قد أصحبنا بعيدين كُل البُعد عن تعاليم الدين في العمل ولم يصبح أحداً مُتقناً مُتفانياً في عمله الا بالــ " فلوس " وكما يندرج في لغة البعض " معاكـ فلوس تدوس " وفعلا من معه الكثير من المال يستطيع ان يشتري بلداً بأكملها

عندما يتخرج أحد الأشخاص من كُلية ما امامه أمرين :

الأول : له واسطة تُعينه في منصب ما او وظيفة ما وكما قلنا " اللي معاه ظهر مبينضربش على قفاه " هذه مقولة حقيقية في مصر وقاعدة عامة

الثاني : ان يكن لديه المال الكافي للوصول الى واسطة مُرتشية تُعينة في وظيفة مُحترمة براتب محترم

واقعة تمت أمام أعين أحد المُقربين وقد روي لي الحادثة بالتفصيل

لا داعي لذكر الإسماء ولكنه كان يتحدث عن شخصية عامة وبارزة في الحكومة المصرية وفي السياسة وفي مجلس الشعب

ذهب الى مكتبة ليجد " ليستة أسعار"ــ

ليستة أسعار رشاوي !! في مكتب وزير ؟ !! أليس ذلك بلغز مُحير

وظيفة في قطاع البترول عليك ان تدفع 100 ألف جُنيهاً

الإتصالات كذلك والكهرباء بملغ وقدره .... الخ

كمثيلة بمحل بقالة او سوبر ماركت صغير ــ تجد قائمة أسعار

وصل بهم الحد الى ان يضعوا قوائم أسعار

وكما قُلنا " الشعب باع ذمته " وايضاً " أغلب الحكومة باعت ذمتها وضميرها " ــ

لكن العيب بمن ؟ العيب بنا نعم وكما قال الشاعر

نُعيب حكومتنا والعيبُ فينا ــ وما لحكومتُنا عيبٌ سوانا
ونهجو الحكومة بغير ذنب ــ ولو علم الرئيسُ لهجانا

تركنا كُل شئ وتمسكنا بذيل الحكومة ؟ نحن نجد صغار الموظفين في مجالس المدينة والوحدات المحلية مُرتشيين اليسوا من ابناء الشعب بل هم الشعب ذاته

لأ انكر زيف المنصب وجبروته وسلطته ولكن ليس لهذا الحد الذي نراه

فهل ستظل مصر بها الراشي والمُرتشي ؟ والأمر بأمره والناهي بأمره ايضاً

يأتي احد القراء ذو دمِ لطيف او لربما به نوع ما من الفُكاهة ويسألني سؤال ؟

الأستاذ محمد البري لو سيادتك بمنصب ما حُكومي او غيره وعرض عليك رجل اعمال ما رشوة بل أقصد كوباً من الشاي بالياسمين ما هو رد فعل سيادتك ؟

لسان حالي ينطق ويتمتم ببعض الكلمات الغير مفهومة


ثم أجب قائلاً : وكما قالت الشاعرة المُخضرمة " مروة"ـــ


( ما اشربش الشاي اشرب كازوزا انا )

فهذا سيكن الجواب الأمثل

والسلام مسك الختام

سلام الله عليكم ورحمته وبركاته


محمد البري

كُلينا لحماً يا حكومة وخصخصي ،،، ــــ

كُلينا لحماً يا حكومة وخصخصي

اصبحنا نتغنى بها في الشارع المصري كل يوم ــ لقد أصبحت الخصخصة شيئاً عادياً بل عرفاً معهوداً في الحكومة المصرية

منذ عام 1999 والأعين كُلها تتجه لخصخصة " عُمر أفندي " لأ اعلم لماذا فهو يمثل قيمة تاريخية واقتصادية كبيرة لمصر ولكن

؟..... اذا عُرف السبب بطُل العجب

لقد بيع لشركة سعودية ومستثمرون سعوديون بمقدار 400 مليون جنية مصر او 450 مليون وهو ما لا يأتي بنصف ثمن المؤسسة ككُل

هل سقطت اسهمها فعلاً ؟ ولماذا في هذا الوقت بالذات ؟ ولما في أحضان تلك الحكومة الحالية ولم تكن في عهد أي حكومة سابقة من عامين ؟

نترك عمر افندي ومهزلته ونتجه لمهازل أخرى

خصخصة البنوك في مصر لأ أدري سبباً مُعينا نراه بأعيننا لخصخصة بنك القاهرة وبنك الأسكندرية ؟ مهما كان المُبررات ؟ ولمن ولصالح من تمت الخصخصة ؟ وكم قبضت الهيئة القائمة على تسعير البنوك او المؤسسات التي تُباع

نذهب الى شركة مصر للألومنيوم والتي بُنيت منذ 36 عاماً ويزيد ،، وقد كانت تكلفة البناء وجميعه برأسمال خمسمئة مليون جنيه مصري كانت تساوي في حينه ما يفوق البليون ومئتي مليون دولار ... لنا ان نتصور ذلك ؟ لأ ادري

نذهب للفرع في نجع حمادي نجد انه قد تم بيع 17 بالمئة من المُجمع كدفعة أولى في عام 2006 وكان الدليل على تفوق الشركة المصرية للألومنيوم انها قد وقعت عقداً لتصدير المنتجات لمدة عشر أعوام مستقبلياً إلى أمريكا

.....

بغض النظر عن هذا وذاك .... هذا ما أتى لحوار بين وائل الإبراشي وطلعت السادات عقب خروجه من السجن

شركة الغزل والنسيج في شبين الكوم والتي كانت مصنعاً يفتخر به كل أبناء المنوفية وكان من أفضل مصانع الغزل في الشرق الأوسط تم بيعه بما لا يأتي بثمن الأرض التي انشأ عليها ؟

بيع المتر بحوالي 150 جنيه في حين انه يساوي 3000 آلاف من الجُنيهات !!

لصالح من ؟ مستثمر هندي !! ولماذا لم يتم شرائها من قبل رجل أعمال مصري ؟ الله وحده اعلم

شركة الدلتا للغزل في طنطا بيعت بمقابل زهيد 100 جنيه للمتر الواحد في حين ان ثمنه 2000 جنيه

وتصدير الغاز الطبيعي لإسرائيل بنسبة 10 في المئة ؟

ــــــــــــــــ

نأتي لمنطعف أخر وهو خصخصة التأمين الصحي ؟

رغم رداءة الأدوية المُقدمة من التأمين الصحي الا ان خصخصته اصبحت كارثة يجب للجمع النظر إليها من كافة الإتجاهات

وخصخصة وزارة الري اصبحت فضيحة جديدة للحكومة وعجزها ؟ هل سيدفع الفلاح مقابل ان يزرع

وما ذاك وذاك بل الكارثة الكبرى الأسمدة وشركتها يخضعون لأحمد عز

الشيكارة كانت بــ 35 جنية دلوقتي بــ 85 ومفيش

بيتصدر بره برخص التراب عشان ماضيين وواكلين ولاهفين من تحت التربيزة زي ما بنقول بالعامية

لكن ما هذا ؟ أين نحن من ذلك يا شعب مصر ؟

أنظر حولك ايها الشاب ستجد أن التعليم العالي أصبح بنسبة 60 بالمئة كُليات وجامعات ومعاهد خاصة

عجبي من شعب مصر ؟ عجبي والف عجب

سيأتي اليوم الذي تُخصخص فيه الشوارع ومن أجل ان تعبر الشارع عليك ان تدفع

بل واخشى ان يتم خصخصة الشعب المصري

في يوم ما سنخلد الى النوم ثم نستيقظ فنجد بيوتنا على اراضي مُباعه وليست حقاً لنا

سنجد ان البلد بأكملها قد بيعت ؟.

طبخوها ــ وخبزوها سوياً طلعت " التورتة " وقسموها

واين نحن من ذلك لا أرى

لربما ان نظري ضعيف بعض الشئ واحتاج لأن ارتدي نظارات صحية

لنا الله

لقد نسيت سؤال هام لمن قرأ ؟

هل ممكن يخصخصوا الأهرامات والسياحة في مصر ؟

وسلام مربع للشعب المصري

وكلنا بصوت عالي نغني للحكومة ونقول

كُلينا لحماً يا حكومة وخصخصي .... وإن بقي في أجسادنا عظاماً مصمصي

والسلام مسك الختام
سلام الله عليكم ورحمته وبركاته


محمد البري