(1)حدوته رقم
يا إلهي! ..كم عمر هذا السائق؟ وكم عمر هذه السياره ؟ لم اصدق عيني عندما جلست بجانبه
فإن عدد الكرمشات في وجهه بعدد نجوم السماء.. تضغط كل كرمشه علي الاخري بحنيه ,وتصنع
وجها مصريا نحته ((مختار))..اما يداه اللتان تضغطان علي المقود فإنهما تتمدان وتنكمشان عبر شرايينها
البارزه وكان شرايين النيل تغذي الارض اليابسه , مع رعشه خفيفه لاتحرك المقود يمينا او يسارا , فالسياره تسير
ثابته الي الامام, وتصدر من عينيه المغطتين بجفنين عملاقين حاله سلام داخلي تبعث في وفيٌ وفي الدنيا الطمأنينه.
شعرت -بمجردالجلوس الي جانبه بفعل مجال مغناطيسي يصدره -ان الحياه بخير..وتذكرت لسبب مجهول شاعري
البلجيكي ((جاك بريل)) وكم كان مخطئا عندما كتب قصيدته الشهيره وغناها تقول :((ما احلي الموت مقارنه بالشيخوخه
وانا الموت بأيه طريقه افضل من الكبر)).لو جلس بريل بجانب هذا الرجل كما افعل الان لمسح قصيدته ب (أستيكه )
انا: حضرتك اكيد بتسوق من فتره.
السائق : انا باسوق تاكسي من سنه 48
لم اتصور انه يمارس مهنه قياده سيارات الاجره منذ قرابه ستين عاما..لما اجرؤ علي سؤاله عن سنه ولكني وجدت
نفسي اسأله عن النتيجه.
انا:وايه ياتري خلاصه خبرتك الي ممكن تقولها لواحد زيي , علشان يتعلم منها
السائق: نمله سوداء علي صخره سوداء في ليله حالكه الظلمه يرزقها الله
انا: قصدك ايه؟
السائق: احكيلك حكايه حصلتلي الشهر ده علشان تفهم قصدي
انا: ارجوك
السائق: عييت لمده 10 ايام عيا شديد , ومكنتش قادر اتحرك من السرير , وانا طبعا علي باب الله يعني اليوم بيومه
معايا..بعد اسبوع ماكنش فيه في البيت ولا مليم .. انا عارف ومراتي مخبيه عليا ...اقول لها حنعمل ايه يا ستي؟
تقوللي الخير كتير يا أبو حسين وهيا عماله تشحت اكل من كل الجيرات..وانا طبعا ولادي الي فيهم مكفيهم , الي جوز
نص عياله ومش عارف يجوز النص التاني ..والي عنده حفيد عيال بيجري بيه في المستشفيات ..القصد مينفعش نطلب منهم
حاجه .ده الواجب ان انا الي اساعدهم..بعد عشره ايام قلت للحاجه لازم ازل الشغل..حلفت عليا وقعدت تصرخ وتقول اني لو نزلت
ح اموت منها ..وبصراحه ماكنتش قادر انزل..بس قلت لازم, كدبت عليها كدبه بيضا وقلت لها ح اقعد في القهوه ساعه..اغير هوا علشان
حاتخنق..ونزلت دورت العربيه ياربنا يا رزاق..فضلت ماشي لغايه ما وصلت عن جنينه الاورمان ولقيت لك عربيه بيجو 504 عطلانه والسواق بتاعها بيشاورلي..وقفت.. قرب مني وقل لي معايا واحد طالع المطارع تاخده علشان عربيتي عطلت؟ واخد بالك من حكمه ربنا؟
معاه عربيه 504 حالتها بريمو وعطلت !! ... قلت اوصله.
ركب معايا الزبون ..طلع من عُمان , ومن عند السلطان قابوس سألني تاخد كام قلت له الي تجيبه ..اكد عليا..الي حدفعه حتاخده ..قلت له ماشي.
وانا في الطريق عرفت انه رايح قريه البضايع علشان عنده حاجه حيخلصها..فعرفته ان حفيدي بيشتغل هناك وانه ممكن يساعده في تخليصها من الجمرك ..قال لي ماشي..وبالفعل رحت ولقيت حفيدي هناك في ورديته..خد بالك هنا ان انا طبعا كان ممكن ما الاقيهوش ..خلصنا الحاجات الي عاوز يخلصها ورجعته الدقي.
سألني تاني حتاخد كام يا حاج؟؟
قلت إحنا اتفقنا ,الي تجيبه , فراح مديني خمسين جنيه خدتهم وشكرته ودورت العربيه..سألني راضي ,رديت وقولت راضي.
قال لي بُص يا حاج الجمرك كان المفروض يبقي 1400 جنيه دفعت انا 600 جنيه.يعني الفرق 800 جنيه دول طالعين من ذمتي
,يعني حلالك و200 جنيه اجره التاكسي ...ادي الف جنيه والخمسين جنيه الي معاك هديه مني!
شفت يا استاذ ..يعني مشوار واحد جاب لي الف جنيه , ممكن اشتغل شهر ومجيبهومش..شوف ربنا نزلني من بيتي وعطل العربيه ال 504
واوجد لي كل المسببات علشان يرزقني الرزق ده...اصل الرزق ده مش بتاعك والفلوس دي مش بتاعتك..كله بتاع ربنا..دي الحاجه الوحيده الي اتعلمتها في حياتي
نزلت من التاكسي اسفا فقد كنت اتمني لو جلست معه ساعات وساعات اخري, ولكن للاسف كان لدي ايضا موعد في سلسله الجري المستمر وراء الرزق.
