أولاً سلام عليكم ورحمة الله وبركاته
ثانياً والله يا جماعة مش عارف أقول إيه بس بجد أعذروني عن غيابي الكبير قوي دا ـ السنة دي ربنا وحده يعلم هي تقيلة عليا قد إيه ؟
وعلى العموم انا كتبت حاجا المفروض كُنت اكتبها لما اخلص الشيت يوم السبت بس قولت يلا مش خسارة وكتبتها النهاردة ويارب إن شاء الله تُكون مُعبرة وكويسة
هي إمتداد لعمل ــ أحسن ناس ــ في وصف الحالة في بلدنا
يلا أسيبكم مع الكلمات
ثانياً والله يا جماعة مش عارف أقول إيه بس بجد أعذروني عن غيابي الكبير قوي دا ـ السنة دي ربنا وحده يعلم هي تقيلة عليا قد إيه ؟
وعلى العموم انا كتبت حاجا المفروض كُنت اكتبها لما اخلص الشيت يوم السبت بس قولت يلا مش خسارة وكتبتها النهاردة ويارب إن شاء الله تُكون مُعبرة وكويسة
هي إمتداد لعمل ــ أحسن ناس ــ في وصف الحالة في بلدنا
يلا أسيبكم مع الكلمات
سلام أحلى سلام
انا جاي في الكلام
وناوي أبدأ كلامي
بسلامي للنظام
وسلامي للحكومة
الطاهرة والعفيفة
اللي واكلة البارومه
عاملة خضره الشريفة
وكمان تعظيم سلام
للحزب وللإخوان
اللي صوتنا في إيديهم
في مجلس عمو فُلان
عارفين دا مجلس مين ؟ !!ـ
واحد من وسط الشعب
وعلشان مخلص ـ أمين !!ـ
بأى فوق وعالي الكعب
وسلام أحلى سلام
لعمو الشيخ حسين
قايل أحلى كلام
بيجيب فتواه منين ؟ !!ـ
ويقول كمان دا عادي
الرشوة والمحسوبية
زي أكل الزبادي
والكوسة والملوخية !!ـ
عارفين عمو الشيخ
بيفتي بإيه كمان
بأن الشيشة جامدة
بتكيف الإنسان !!ـ
ولا عمو الوزير
عامل شغله تمام
ومضبط التضابيط
عامل أحلى نظام !!ـ
ولا أمين الشُرطة
بأى بيه وإبن بيه
لما تشوفه شاورله
أجري وحب إيده !!ـ
عشان تبأى صح
وتمام ومية مية
وتقول للظلم بح
صحيح أبو مفهومية !!ـ
تعالى ارمي السلام
لحبيبك الغلبان
دا مغرق العبارة
عايش بعيد هربان !!ـ
وأرمي أحلى تحية
لعمكـ الحرامي
تلاقاه بُكرة وزير
خليك فاكر كلامي !!ـ
ودحرج التماسي
على كل شيخ في القعدة
بيألف الفتاوي
أصل الفلوس مساعدة !!ـ
بيفتي بكل كريم
ويقول وصى وقال
وينفي في التحريم
ويكتب عليه
موال !!ـ
وسلامي للداخلية
العادلة والأبية
بتقول للظُلم لأ
ونِعم الإنسانية !!ـ
مفيش أي حاجا
ولا اي مُعتقل
ولا تعذيب وغيره
ومفيش فُلان إتقتل !!ـ
ومفيش أي إهانة
للعدل والقضاء
واللي انضربوا أمانة
غلطوا وأخدوا الجزاء !!ـ
أصلها تمثيلية
كبيرة حبيتين
قلنا نعمل قضية
تشغلكم لو يومين !!ـ
وسلامي للتعليم
للأخلاق الرفيعة
دا التفكير السليم
إبعد عني قطيعة !!ـ
وسلامي للشباب
اللي عايش يكافح
وداخل كُليات
والله ما هو نافع !!ـ
خلاص يا ابني انتا
راح زمن المُعجزات
لو كان عندكـ أمل
فأمل أبوها مات !!ـ
هتتخرج يا عيني
ومسيرك ع الرصيف
هتتشحطط يا قلبي
على حتة رغيف !!ـ
الا في حالة واحدة
عارف انا اقصد إيه
معاك واسطة تزقكـ
ظهر بتسند عليه !!ـ
هتلاقي نفسك فوق
في القمة الأخيرة
لو حتى كنت فاشل
عارف لُبنا وسميرة !!ـ
وسلام أحلى سلام
وخلصت الكلام
وناوي أختم كلامي
بسلامي للنظام
بسلامي للنظام
محمد البري ـ نوفمبر 2007
15 comments:
صباح الخير باليل
مع نفسك بقى يابرى
مليش دعوه
وبلغ اجدع سلام مني للنظام
النظام الى مأكلنا ومشربنا
ربنا يخلهولنا ويطولنا فى عمره كمان وكمان
احلى سلام و كلام
للحكومه و النظام
اصلهم اجدع ناس
ما لهمش في الخصام
و لا حتى في الصدام
ولا بيحبوا الصداع
بيحبوا الصراحه و الامانه
و يكرهوا الخداع
يشيلونا في ايديهم
وما يرموناش للضباع
لا يضيعونا و لا يبهدلونا
بيدلعونا و لا يكسرونا
و لا حتى يقتلونا
ملعون ابو ابونا لو كلمونا
نبقى كدبين و كداب ابو ابونا
لان حتى الكلاب ما بيورونا
وخلاص زهقنا منهم
وزهقوا من ابونا
في سجونهم مبيتين
ناكل و نشرب وكمان نخرف
وهما يا عيني ديما سهرنين
و علي حميتنا مبيتين
واحنا في السجون نايمنين نشخر
سلامي للحكومه و النظام و اللي عايز يزقطط
اصلهم هيفتحو زنازين ع النيل بسراير من حرير للمحررين
و اللي عايز يتحرر
وكمان وساده للمفكرين و المثقفين
واللي بيعرف يتكلم
عشان يحطوا راسهم عليها وينامو بالامهم
وسلامنا للحكومه و النظام و الاخرص اللي ما بيتكلم
ما شاء الله قصيدة جميله
كلكل والله منورني يا حُبي ـــ هههههههههههههههه وسلامك وصل وفوقيه النُقطة هههههههههههههه
اللهو الخفي أطلالة بهية على مدونتا ودايماً منورنا إن شاء الله وبلوجك السياسي جامد بس حاسب على نفسك شوية يا نجم
أنا مُسلمة منورانا والله يا أُخيتي وتسلمي على بلوجك الجميل ومتابع ان شاء الله
جامد يا معلم
هوا اللي ملبسنا
!!!!
والمعني في بطنك
قصدي بطن الشاعر يعني
هو المفروض دا شعر
lio حُبي منور والله واحشني ـ ردك في البوست شرف لينا يا باشا ودايماً منورنا يا دوكـ
marko maykel
هو المفروض دا شعر
ــــــــــ
ممكن تعتبره دقن ـ عادي اللي يعجبك ـ
دا اسمه شعر عامي ـ وليه طرق عرض كتير انا عرضته بطريقتي دي ـ ومنورني
فهمتنى غلط :D
marko maykel
فهمتنى غلط :D
ـــــــ
يا عم خلاص دا مش شعر ولا دقن ـ ولا عامي ولا عامكـ ـ دا هجص :D
هفهمك إزاي بس !! مش عارف معلش فهمي تقيل شويتين :( حُكم السن بأى
ايه طريقه الكلام دى ؟!!؟
دا اسلوب كلام شاعر اساسا ...انا هقولك نصيحه . .
عامل زوارك بنضافه و احترام
سلام
marko maykel الأخ
أولاً سيادتك مال طريقة مُعاملتي مش نظيفة خلاص اغسلها لحضرتك الطريقة خالص ولو مش بإيريل هخليها بأومو ـ ثانياً انا لا غلطت فيك ولا قولت في حقك كلام وحش ـ عشان تقولي دي مُعاملة
ثالثاً : انا مش شاعر ـ انا مُجرد هاوي ـ وبحب الشعر العامي وبحب اكتبه وبس ـ فأنا مش شاعر وحط دي في إعتباركـ
رابعاً : لو حضرتك اخدت كلامي محمل الجد فدا غلط منك لاني بهزر زي ما سيادتك اتفضلت وسألت سؤال غريب في أول رد ليك وجاي تقولي مفهمتنيش ـ طيب ما تفهمني مش تعلقني بالكلمة وتمشي
خامساً : انا بحترم اي حد سواء هنا او في اي مكان ـ وهقول لحضرتك حاجا مش عجابك البلوج متردش :) عشان بس مضيعش وقت حضرتك
سادساً : سلام عليكم
يا سلام على الكلام
اللى كله فى التمام
اللى لا يودى اللومان
ولا حتى يجيب جنان
مالك بس اية جرالك
قصدى مالك بالنظام
عيش مطنش وانت مالك
واية يعنى تعيش جبان
مانت زيه وزية انت
بس الفرق فى حاجة واحدة
ناس بالحق عايشة ثابته
وناس بالذل ماتت ساكته
وعلى لسانها ميت لجام
وعلى لسانها ميت لجام
راني منورة يا جميل ـ وشُكراً للرد بتاعك ودايماً منورانا ووحشتنا مواضيعك قوي
ــ فينك يا بنتي مُتخفية كدا ليه !! محدش بيشوفك يعني !! ع العموم ربنا يوفقك
كلام ميه ميه بجد
يسلمو الايادي
انا رواء ودي المدونه بتاعتي
ياريت تزورني
http:/rawaastar.blogspot.com
Post a Comment