(1)
في يوم ناديت الأمل جاني كتاب مقفول
صفحاته متقطعه وفي كل سطر لقيت
كلمة بتصرخ قايلة
إن الضمير مقتول
*****
(2)
دق الهوى بابي فقفلت على قلبي
نادى بعلو الصوت أفتح دا انا حبيبك
قلت الهوى غدار
جرّح كتير قبلي
*****
(3)
لما سألني جدي قلت في جوابي لأ
قالي ما تكتم صوتك لو يوم جالك سؤال
إياك تضعف يا ولدي
وتقتل ضنايا الحق
****
(4)
غنى القمر في سماه ـ أول ما الشمس غابت
غازل كل النجوم ـ خلاها فيه دابت
وأهو باس خد السما
لما العيون نامت
ــــــــــــــــــــ
(5)
قلبي إنجرح بالعشق ـ من هجر أغلى حبيب
روحت ميدان الهوى ـ حسيت بنفسي غريب
قالوا زمان العشق
جرح مالو طبيب
(6)
جاني في منامي حلم ـ مع عمي الشيخ لطيف
كان الحلم كابوس ـ والمنظر كان مُخيف
طفل بيموت في حرب
على شئ إسمه رغيف
(7)
قلمي وشوشني فجأة ـ وقالي كلام بسيط
هكتبلك أي حاجا ـ وهزود الشخابيط
واللي هيقرأ كلامي
هيحلف بإني عبيط
(8)
الدُنيا زي مزيكا معزوفه ببيانو
اللي يعيش ليوم مبسوط ـ يطلعلها لسانو
مش عارف إنها فانيه
والآخره بقيالو
ـــــــــــــــــــــــــــــ
(9)
فرعون دا لما ظلم ـ جه الزمن هده
وعز إبن حلال ـ مين ياهوه قده
حديد وطالع في السما ـ ومرفرف في العلالي
وهو يبأى إبن مين ـ فرعون دا كان جِده
(10)
في مجلس شعب واقف ـ نائب من النواب
شارح لكل وزير ـ على إيه كان الإضراب
ولما نطق بالحق
قالوا دا إبن كلاب
(11)
كل شئ في الدُنيا ـ مخلوق أكيد م العدم
والناس اتغيرت ـ والدُنيا اتبعترت ـ لازم في يوم تتصدم
الكُل بايع للضمير والحق والأخلاق
يندم لما تجيله مُصيبه ـ هيفيد بإيه الندم
(12)
قالي صحبي في يوم ـ الحب مالو أمان
عذاب ـ وناره قايده ـ لهب بلا دُخان
مرض ودواه في عدمه
بيلازم الإنسان
(13)
سأل الضمير في يوم وزير ـ من أين لك هذا
رد عليه بحكمة ولين ـ دا سؤال ملوش عازه
كان الضمير ناسي ياهوه ان اللي اتسأل
كان اتولد فـ يوم مبروك ـ وفي بقه بزازه
(14)
الصبر مُفتاح الفرج ـ واللي بيصبر ينول
واقف على باب الفرج ـ وبستنى الدخول
لقيت إعلان كدا ملزوق ـ على باب المُدير
لازم أبوك يا بيه واصل أو حتى مسئول
(15)
لما لقيت أنا الوظيفة ـ سألوني ع الكوسه
عمك وخالك مين ـ والرُتبة كام بوسه
طلعت انا اهبل عبيط ومصدق الإعلان
بالزمة ابقى انا فقري ـ ولا إبن منحوسه
