!!! ليه احنا كده

انا مخنوق
انا مضايق
مش عارف حاسس اني مش طايق حد
ايه الملل ده....

جمل بنسمعها يجي 100 مره في اليوم
وانا من اول ناس بيقولوها
مش عارف ليه؟؟
هل فعلا لان الدنيا وحشه
ولا لان احنا الي وحشين
ليه دايما بنقول احنا مضايقين واحنا زعلانين واحنا مش عارف ايه
ونقعد ساكتين وخلاص
ليه منفكرش في الاسباب الي بتخلينا مضايقين ونحاول نحالها

مش عارف...
يمكن يكون بعد عن ربنا
يمكن تكون فعلا ظروف الحياه بقت صعبه
يمكن علشان حياتنا بقيت ورتنينه ومفيهاش تغيير
مش عارف...

يمكن لاننا حاسين انا احنا عايشين لوحدنا ومحدش حاسس بينا
يمكن لاننا اساسا مش راضيين عن نفسنا
ممممممممممممممم
مش عارف

سؤال بسأله ليا قبل ما اسأله ليكم
ليه احنا كده؟
وهيا الحياه تستاهل كل ده؟؟

ملحوظه : انا كاتب الهمسه دي وانا "مخنوق"

written by : kalcool

جامع الشواهد ـ للبري وأبو خالد !! ـ

أولاً : بسم الله الرحمن الرحيم



ثانياً : من هنا ومن فوق منصة الحديث ومنبر الكلام ـ على اني بخطب ـ بعتذر بجد عن مستوى المدونة اللي بأى في النازل قوي لإنشغالي بس والله مشاغل ـ والكُلية تطلع عين الواحد ـ ومشاكل النت اللي وقفت في الأجازة وكدا !! بس انا قولت إزاي لأ لازم ارجع بحاجا جامدة ـ وان شاء الله تكون جامدة زي ما تصورت ـ

دي عبارة عن شعر عامي ـ بيني وبين واحد صحبي ع الإيميل ـ يُدعى بالإسم ـ خالداً ـ وخالد حبيبي إعدادي هندسة حلوان ـ وانا بكلمه في يوم ع الإيميل سرحنا شوية وقولنا نكتب اي حاجا كدا ع الماشي

قالوا زمان يا ناس
الغالي تمنه فيه
أجيب منين فلوس
يا خلق وأشتريه !!ـ

وأعمل إيه يا عالم
الحاجا غالية نار
في ناس تاكل فيليه
وتحلي بالخيار !!ـ

حتى دا كيلو الفول
كمان غالي علينا
ورغيف العيش ياهوه
ـ طابوره ـ طلع عنينا !!ـ

واقف في طابوري شايف
واحد ـ راكن ـ حُمار
يعبي في عيش وماشي
مولعلي السيجار !!ـ

خدعونا يا ناس وقالوا
ده البيض حلو و تمام
ده تمنه معلّى ضغطى
يا عم غور ونام


ولا طن الحديد
سعره ناطط لفوق
اونكل " عز " حبيبنا
عايز كُله يدوق !!ـ

من فيض كرمه الكبير
فاتح كام ألف بيت
وباقي الشعب يصرخ
من ـ سعره ـ العفريت !!ـ

قولت أبنيلي بيت
واعملي كام عمارة
لقيت الطوب مشعلل
جايب ليهم خُسارة !!ـ

اصل المازوت غالي
يا خلق حبيتين
قالوا الطوب دا ابنه
لازم ـ يغلى ـ يومين


****

وخرجت م الكُلية
قالوا شُغل مفيش
قضيتها ع القهاوي
بالأفيون والحشيش !!ـ

ولقيت الدُنيا ضلمة
يا ناس أروح لمين !!ـ
قالولي الحل جاهز
روح شدلك نفسين

وانا مره وحدي قاعد
لقيتلك شيخ معدي
قعد يحكي معايا
وسألني ايه اللي عندي ؟

حكيتله كل حاجا
من أول المشوار
قالي ربك مسامح
ربك حليم غفار

ونصحني اني اكافح
اعمل مشروع بسيط
وساعدتني الحكومة
قصت ليا الشريط !!ـ

من أول يوم يا عمي
وانا معزوق مصروفات
ورق ترخيص وغيره
والأدهى إمضاءات

محتاجة كام لحلوح
من جيبي اللي انخرم
ال إيه عايزين رشاوي
متقولشي هبني الهرم !!ـ


وسألت الناس قالولي
طريقك على بره سالك
اضرب ـ باسبور ـ وخلص
ع البحر ـ متقولش هالك


بيّعت ابويا وأمي
كل اللي حوشوه
وسافرت ويا أخينا
ولقيتهم ـ فتشوه ـ !!ـ

اتاريه كان مدلدل
من جيبه كام جنيه
الضابط قام منادي
مشوا سعادة البيه !!ـ

واتكومنا في مراكب
والكُل فوق بعض
ونلاقي حاجات بتقرض
يا أخينا بطل " عض "



يا مصر يا بلدي
إحترت انا فيكي
لا وجودي يوم عاجبك
ولا هربي يرضيكي !!ـ